Gramática - Academia de la Llingua Asturiana

XXIII.
La oración
y les funciones
oracionales
348
2.2 Menes d'oraciones
Acordies cola so estructura, les oraciones puen ser:
• Oración mínima / oración non-mínima
La oración mínima ye aquella constituida únicamente pol nucleu verbal
(llegaron), únicu elementu imprescindible. Oración non mínima ye aquella
onde'l nucleu verbal vien enancháu por un o más términos subordinaos
(los tos pas llegaron bien).
• Oración simple / oración compuesta / oración complexa
Oración simple ye aquella que nun tien como componente nenguna otra
oración (escribió un llibru). Oración compuesta ye la formada por dos o
más oraciones yustapuestes o coordinaes (escribió un llibru y espublizáron-ylu
nuna editorial de Xixón). Oración complexa ye la que tien como
componente dalguna oración trespuesta a función nominal, seya sustantivu
(díxonos que nun quería comer), axetivu (escribió un llibru que fala de
la mar) o alverbiu (ye simpáticu cuando lu emponderen).
Según la naturaleza del verbu, les oraciones puen ser:
- Atributives o copulatives: les constituyíes por un verbu atributivu, qu'esixe
un desendolcu per ente medies del sintagma llamáu atributu. Ver
XXIV.
- Non atributives o predicatives: les constituyíes por un verbu non atributivu
y con un desendolcu per ente medies de complementu direutu o de
suplementu.
3
Funciones oracionales
Llámense asina les exercíes autónomamente por cualquier sintagma nominal
(sustantivu, axetivu o alverbiu) en subordinación dientro del nucleu de
la oración.
3.1 Suxetu léxicu
3.1.1 SUXETU GRAMATICAL Y SUXETU LÉXICU
Llámase función predicativa a la rellación constituyente de la oración, realizada
dientro del nucleu verbal ente dos términos: el lexema verbal y el
morfema de persona (o seya, el suxetu gramatical). Poro, toa oración, pol
fechu de selo, tien suxetu gramatical: 1ª, 2ª ó 3ª persona del singular o del
plural.