Gramática - Academia de la Llingua Asturiana

- Si los sustantivos son de xéneru estremáu, l'axetivu concuerda con ellos
en masculín y en plural. Exemplos: l'horru y la panera son vieyos, la
neña y el rapacín tán galdíos.
3.4 Preposición con grupu combináu
Cuando'l sintagma formáu por términos qu'entren nuna combinación ta
precedíu de preposición, ésta pue encabezar tola serie o caún de los miembros:
esos trenes vienen de Llanes, Mieres, Cuideiru ye igual que esos trenes
vienen de Llanes, de Mieres, de Cuideiru. Lo mesmo asocede na coordinación:
falái con Llucía, Andrés o Ana equival a falái con Llucía, con
Andrés o con Ana.
Sicasí, la repetición de la preposición ye imposible na aposición: un llibru
del poeta Fernán Coronas (non *del poeta de Fernán Coronas).
4
Construcciones d'interdependencia
La interdependencia consiste na xuntura de dos términos en dependencia
billateral, lo que fai que caún de los miembros necesite al otru y seyan
dambos mutuamente imprescindibles pal caltenimientu de la función dientro'l
grupu.
Na interdependencia, la categoría y les posibilidaes combinatories del
grupu puen nun coincidir cola de caún de los sos miembros. Por exemplu,
en les cartes unviáronles el mes pasáu, el grupu formáu por sustantivu y
axetivu funciona como un alverbiu na función de complementu circunstancial.
Tampoco'l grupu interdependiente nun tien por qué amosar les
mesmes carauterístiques morfolóxiques que los sos miembros. Por exemplu,
en nun sabes bien lo fatos que son, el plural presente nel interior del
grupu nun se tresllada fuera d'él; de fechu, sintácticamente ye un conxuntu
singular: nun lo sabes bien.
Per aciu d'una rellación d'interdependencia, una xuntura de términos llogra
l'adautación unitaria a una función y una categoría determinaes. Nesti
sen, la interdependencia da llugar a:
- Categoría sustantiva. Exemplos: nun sabes bien lo fatos que son (complementu
direutu), paez tremendo les coses que cuenta (suxetu léxicu),
falen de lo mal que lo fizo (suplementu).
XXII.
El grupu
nominal
343