Gramática - Academia de la Llingua Asturiana

XXII.
El grupu
nominal
342
- YUSTAPOSICIÓN. Consiste nuna combinación cenciella de los términos
combinaos, que queden xebraos por pauses (reflexaes na escritura per
comes) y ensin conxunción nenguna. Exemplos: entraron Marta,
Xandru, Lluis; ye toscu, neciu, falanciosu; fai les coses apriesa, mal,
tarde.
- COORDINACIÓN. Consiste nuna combinación que s'establez per aciu d'una
conxunción, esto ye, un conector dotáu de conteníu semánticu. Si esti
conteníu ye'l d'amestadura o suma, trátase de la conxunción y o ya (pescaron
sardines y ~ ya bocartes); si ye amestadura negativa, emplégase la
conxunción copulativa negativa nin (nun pescaron sardines nin bocartes),
anque nesti casu paez meyor falar d'una conxunción complexa non
~ nun... nin; si se trata d'una alternancia o una esclusión ente dellos términos,
entra en xuegu la conxunción dixuntiva o (tarden dos o tres
hores); y si se fai una contraposición, úsense les conxunciones adversatives
pero, mas, sinón (ye caru pero ~ mas bonu, nun foi Xuan sinón
María).
- APOSICIÓN. Trátase d'una combinación onde los elementos xúnense ensin
conector nin pausa, siendo esos términos de la mesma xerarquía funcional,
de la mesma función y categoría, y faciendo la mesma referencia na
realidá, magar que contemplada dende dos aspeutos distintos. Acordies
cola categoría de los componentes y del conxuntu, les aposiciones puen
ser sustantives (el poeta Fernán Coronas, la canción "La Gozoniega") o
alverbiales (asina como te digo, súpolo entós naquel momentu).
3.3 Concordancies col grupu combináu
No que se refier a les carauterístiques morfolóxiques del grupu combináu,
han tenese en cuenta les siguientes observaciones:
- Cuando un mesmu axetivu o referente tien de concordar con un conxuntu
de dos o más sustantivos, cúmplese que l'axetivu o'l referente apaecen
en plural, nun importando en qué númberu apaezan toos o dalgunos de
los sustantivos. Exemplos: el pá y el fíu son uvieínos, el pá y los fíos son
uvieínos, la casa y el coche tán aseguraos, les cases y los coches tán aseguraos,
la muerte y la vida eternes.
- El xéneru, si nun ye coincidente, neutralízase nel masculín: el parllamentu
y la conseyería tán esmolecíos col tema.
- Si los sustantivos son del mesmu xéneru, l'axetivu apaez nesi xéneru y
en plural. Exemplos: el güe y el xatu pintos; la muyer y la fía son avilesines;
la puerta, la ventana y la canciella tán trancaes.