Gramática - Academia de la Llingua Asturiana

XXII.
El grupu
nominal
340
Ha tenese en cuenta que l'emplegu del referente ello axústase a lo que ye
normal nos referentes de xéneru neutru. Exemplos: nun me quites el tabacu,
que nun puedo pasar ensin ello; écheslo ente agua y llueu con ello faes
una pastia (referencia a "arroz"); tienlo ehí que nun mira pa ello (referencia
a "ropa"); vuelvi con ello calentao (referencia a "sopa"); nun toques
d'ello, que ta pintao (referencia a "madera").
2.12 Construcciones partitives
Los indefiníos cuantificadores –a nun ser tou toa too– almiten, per un llau,
l'emplegu normal como axetivos concordando col sustantivu al que son
subordinaos: bebisti poca lleche, comieron pocos figos, dionos abondes
ablanes, picaron abondu carbón, cumplió bastantes años, recebáronlo
con bastante cal, tapáronlo con munchu barru, vendíemos munches entraes,
díxitelo demasiaes veces, echasti demasiáu sal, díxitelo tantes veces
que yá fartuqué, ¿arramaron tantu vinagre?, ¿quies más arroz?, Lluis
quier más (menos) cacagüeses.
Pero tamién almiten la llamada construcción partitiva. Nella, l'indefiníu
fai de nucleu sustantivu en concordancia —neutra en casu de non cuntable—
con otru sustantivu camudáu en términu subordináu per aciu de la
preposición de: bebisti poco de lleche, comieron pocos de figos, dionos
abondes d'ablanes, picaron abondo de carbón, cumplió bastantes d'años,
recebáronlo con bastante de cal, tapáronlo con muncho de barru, vendíemos
munches d'entraes, díxitelo demasiaes de veces, echasti demasiao de
sal, díxitelo tantes de veces que yá fartuqué, ¿arramaron tanto de vinagre?,
¿quies más d'arroz?, Lluis quier más (menos) de cacagüeses.
La mesma construcción partitiva ye la qu'apaez nel indefiníu pocu -a,
siguíu d'un subordináu con de y un sustantivu non cuntable. Asina, de cargái
pocu carbón y apúrrime poca fruta surden les construcciones partitives
cargái poco de carbón y apúrrime poco de fruta. Por elipsis de la preposición
de, llégase a espresiones como cargái poco carbón y apúrrime
poco fruta, onde l'indefiníu neutru sustantiváu tien la falsa apariencia d'un
axetivu antepuestu neutru. Ha tenese tamién en cuenta qu'esiste, per otru
llau, la espresión sustantiva un pocu, que pue dir acompañada de subordinaos
precedíos de de, preposición que tamién pue desaniciase: cargái un
pocu (de) carbón, apúrrime un pocu (de) fruta.
No que se refier a los indefiníos esistenciales, los plurales dalgunos dalgunes
y dellos tamién almiten, per un llau, l'emplegu normal como axetivos
concordando col sustantivu al que tán subordinaos (tenía dalgunos