Gramática - Academia de la Llingua Asturiana

tantivu, siendo capaz entós d'exercer les sos funciones propies: con quién
faló preocúpame a min muncho (suxetu), quiero saber con quién faló
(complementu direutu), nun-y doi importancia a con quién faló (complementu
indireutu), quexáronse de con quién faló (suplementu), etc.
Si apaecen como nucleu de sintagma, puen acompañase de términos
subordinaos de valor esplicativu: ¿quién, que tenga coraes, pudo facer esa
barbaridá?; ¿quién d'eses diputaes votó non al proyeutu?; nel caxón de
los llibros, ¿cuántos nuevos atoparon?; ¿cuántos de vós van dir al Naranco?;
llama a les emplegaes y entrúga-yos cuántes d'Uviéu quieren quedar;
¿cuánto d'oliva y cuánto de maíz? (referencia a "aceite").
Como axetivu, cuántu -a -o pue usase n'allugamientu antepuestu al sustantivu
(¿cuántu pan quies pa mañana?; dicíime cuánta lleche vos pongo)
o como nucleu (¿pa cuántos ye esti dineru?, ¿cuántes van dir a la cena?,
¿cuánto traxeron pa nós?).
2.11 Los pronomes tónicos nel grupu nominal
Los pronomes tónicos, como subclás de la categoría sustantiva, amuesen
dellos trazos especiales. Ente éstos atópase la gran restricción a la hora
d'acompañase de términos subordinaos. Namái unos pocos d'elementos
apaecen como subordinaos a los pronomes tónicos:
- Mesmu -a -o, que vien a reforzar la presencia del pronome tónicu. Asina,
danse sintagmes en función de suxetu: yo mesmu, yo mesma; tu mesmu,
tu mesma; él mesmu, ella mesma, ello mesmo; usté mesma; nós mesmos;
nosotres mesmes; vós mesmos; vosotres mesmes; elles mesmes; ustedes
mesmos; etc. Y tamién precedíos de preposición: a mi mesmu, de ti
mesma, contra él mesmu, ensin ella mesma, con nós mesmos, etc.
- Tou toa too. Exemplos: l'edificiu ta tou él cayendo de vieyu, la casa ta
toa ella pintada, la ropa quedó too ello entafarrao de sarriu, toos nós
quedemos amurniaos, toes vosotres tais allegres de la noticia, doi-yos les
gracies a toos ustedes.
- Solu -a -o. Exemplos: yo solu, tu sola, contigo sola, él solu, d'ella sola,
ello solo, ellos solos, usté solu, etc.
- Numberales cardinales. Exemplos: nosotros dos, nós tres, de vós cuatro,
con vosotres cinco.
- Oraciones axetives de calter esplicativu. Exemplos: yo, que lu conozo
perbién, nun supi qué-y dicir; a nós, que la conocemos perbién, nun se
nos alvirtió dici-y nada.
XXII.
El grupu
nominal
339