Gramática - Academia de la Llingua Asturiana

grupu sintagmáticu: más pan, menos xente (non *pan más, *xente menos).
Almiten l'allugamientu pospuestu si precediendo al nucleu hai otros determinativos:
cuatro selmanes más, munchos llibros menos. Pela so parte, el
cuantificador tanto tolera los dos allugamientos: tanta fariña o fariña
tanto.
2.8.2 INDEFINÍOS ESISTENCIALES
Pela so parte, dello, dalgo, daqué y nada son sustantivos (apúrrime dello,
díxome dalgo, cayó daqué en suelu, nun coyeron nada) que puen exercer
funciones d'alverbiu (gustóte dello, duelme dalgo'l todíu, ye daqué fatu,
nun queda nada lloñe). Como sustantivos, na construcción partitiva puen
recibir un subordináu precedíu de de (dello de pan, dalgo de sal, daqué de
quesu, nada de sidra), preposición que pue desaniciase por tar precedida
de nucleu acabáu en vocal (dello pan, dalgo sal, daqué quesu, nada sidra).
Convién nun confundir les estremaes estructures sintáctiques que s'atopen
cuando un una uno y cualquiera ~ cualesquiera son axetivos y cuando son
sustantivos. Asina, nos exemplos que siguen darréu funcionen como axetivos
y subordinaos d'un nucleu sustantivu: facía un fríu que tarazaba,
cualquier ~ cualesquier mañosu pue igualo. Pero nestos otros, l'indefiníu
ye sustantivu y nucleu de sintagma, acompañáu d'un axetivu (un conviértese
en ún o unu, y cualquier ~ cualesquier en cualquiera ~ cualesquiera):
diéronme ún ~ unu fríu y otru caliente "un bollu que taba fríu"; d'estos
obreros, cualquiera mañosu pue igualo "cualquiera d'ellos que seya mañosu".
Como axetivos, un, dél, daqué y cada nun almiten otru allugamientu que
l'antepuestu nel grupu sintagmáticu: una casa, della xente, daqué cosa,
cada rapacín. El restu d'axetivos esistenciales pue allugase delantre del
nucleu o tres d'él: nun vieron nengún osu ~ nun vieron osu nengún, dala
cosa ~ cosa dala, cualquier pueblu ~ un pueblu cualquiera. Esta llibertá
d'allugamientu tamién la tien dalgún, pero únicamente n'oraciones negatives:
vieron dalgún osu, nun vieron dalgún osu o nun vieron osu dalgún.
L'indefiníu cada funciona siempre como axetivu. N'emplegos onde paez
usase como axetivu sustantiváu, constátase en realidá una elisión del sustantivu.
Exemplos: el periódicu, ¿de qué sitiu lu quies, d'Uviéu, de Xixón
o de Madrid? –dame ún de cada (sitiu).
Pelo xeneral, los esistenciales permiten llibremente la concordancia con
cuntables y con non cuntables. A esti respeutu, obsérvase que nada refierse
namái a non cuntables: de tol quesu que traxo nun dexó nada. Pela so
XXII.
El grupu
nominal
335