Gramática - Academia de la Llingua Asturiana

pospuestu mio, to y so tienen terminación común pa los tres xéneros: el llibru
mio, la casa mio, el carbón mio, la ropa mio; el llibru to, la casa to,
el carbón to, la ropa to; el llibru so, la casa so, el carbón so, la ropa so.
Los posesivos nuestru (nuesu), -a, -o y vuestru (vuesu) -a, -o presenten
n'allugamientu antepuestu les terminaciones de masculín y femenín, mentantu
nel pospuestu ufierten les de masculín, femenín y neutru; lo mesmoyos
asocede al restu de les formes posesives del modelu B: míu -a -o, tuyu
-a -o y suyu -a -o. Exemplos: el neñu míu, la casería vuesa, el platu tuyu.
Ténganse en cuenta les concordancies neutres: el carbón vueso entá nun
llegó, va quitar del tendal la ropa tuyo, anden engañando a la xente nuestro.
L'axetivu posesivu pospuestu pue acompañase d'alverbios cuantitativos
como términos subordinaos: ye una manera mui vuestra de facer les
coses; yeren visaxes bastante tuyos.
2.7.2 EL POSESIVU COMO NUCLEU NOMINAL
Cuando'l posesivu se trespón a sustantivu ufre les carauterístiques propies
d'esa categoría, ente elles el ser nucleu de subordinaos axetivos y l'apaecer
acompañáu d'artículu.
Nestes circunstancies, el xéneru y el númberu del posesivu queda determináu
pol xéneru y el númberu d'otru elementu sustantivu al que se fai
referencia dientro d'una situación o d'un contestu. Asina: les mios ("les
camises") téngoles tendíes, el rapacín comió la to ("la mazana"), burlláronse
muncho del vuesu ("l'acentu"); lo mio ("la ropa") téngolo tendío, el
rapacín comió lo to ("la fruta"), burlláronse muncho de lo vueso ("que nun
vos atreviereis a viaxar n'avión").
Estos posesivos –como cualquier elementu sustantivu– puen acompañase
de subordinaos axetivos: el rapacín comió lo to que quedaba en platu, les
mios ("camises") blanques téngoles tendíes.
Y, lo mesmo qu'otros elementos sustantivos, puen tresponese a axetivos per
aciu de preposiciones: el tendal de les mios ta enllenu; lo raro de lo vueso
ye que nun-y lo dixistis a naide; ¿les mazanes? mira la gaspia de la to.
2.8 Los indefiníos nel grupu nominal
Cuando exercen d'axetivos, unos tienen llibertá p'allugase delantre o
detrás del nucleu nel grupu sintagmáticu nominal (abonda sidra, sidra
abondo); pero otros namái puen allugase delantre (otru día). Los axetivos
XXII.
El grupu
nominal
333