Gramática - Academia de la Llingua Asturiana

La preposición de enxamás desapaez cuando introduz un complementu
circunstancial o un suplementu. Y asina, dizse en tou momentu Xuan venía
de Xixón, el neñu blincaba d'allegría, el día 7 cai de llunes, el tren llega
de nueche, quéxense de too, y non *Xuan venía Xixón, *el neñu blincaba
allegría, *el día 7 cai llunes, *el tren llega nueche, *quéxense too.
Polo mesmo, tampoco desapaez cuando introduz un atributu: el mio llibru
ye de matemátiques, esa xente ye de Llangréu, y non *el mio llibru ye
matemátiques, *esa xente ye Llangréu.
b) En delles perífrasis verbales, anque la pallabra anterior acabe en consonante:
acaben de xintar o acaben xintar, deben de sabelo o deben
sabelo, habrás de dexámelu o habrás dexámelu. Ver XVI.14.1.
La normativa ortográfica del asturianu propón que, cuando seya potestativu'l
desaniciu de la preposición de, se caltenga cualquiera de les dos posibilidaes
na llingua escrita. Al mesmu tiempu aconséyase qu'en casu de
dulda s'escriba siempre de.
Amás de lo anterior, la supresión de la preposición de nel asturianu escritu
ha cumplir les siguientes condiciones:
a) Que nun se dea ambigüedá na fras.
b) Que nun se faiga difícil la comprensión.
c) Que la supresión de de se faiga namás que naquellos casos en que tea
perafitada na fala.
2.6 Los demostrativos nel grupu nominal
Na so función d'axetivos, los demostrativos exercen como subordinaos de
núcleos sustantivos y concuerden con ellos en xéneru y númberu como
cualquier otru axetivu. Puen presentase allugaos como subordinaos antepuestos
o pospuestos al sustantivu:
2.6.1 SUBORDINAOS ANTEPUESTOS AL SUSTANTIVU
Nesti allugamientu, los demostrativos namái puen emplegase nes formes
masculines o femenines, en concordancia col sustantivu. El demostrativu
siempre ye incompatible col artículu, y pue usase como términu subordináu
únicu: esti animal llámase esperteyu, nun te calques nesa mesa, muncho
allababen aquella sidra, esi fumu va afoganos.
N'allugamientu antepuestu, pue apaecer xunto a otros elementos, sobre too
indefiníos y ocupando cuasi siempre'l primer llugar: nun t'acordasti d'esi
otru chiste, cuntónoslo aquel mesmu rapaz, con esa poca lleche nun faes
XXII.
El grupu
nominal
331