Gramática - Academia de la Llingua Asturiana

XXII.
El grupu
nominal
330
cial), el profesor de quien te falé ye esi (suplementu), la manera como lo
fixo nun ye la más amañosa (complementu circunstancial), l'añu cuando
se casaron hubo una seca tremenda (complementu circunstancial), toes
cuantes ganó fundióles nel xuegu (complementu direutu), la casa onde (u,
au) vive ye bien afayadiza (complementu circunstancial).
Más detalles sobre les oraciones relatives puen atopase en XXV.2.2.
F) TRESPOSICIÓN VERBU ’ ALVERBIU
Asocede cuando un nucleu verbal (una oración), gracies al relativu que, ye
a exercer la función de términu subordináu d'un alverbiu. Exemplos: siempre
qu'entruguen, depués qu'atapez, llueu que nos lo dixo.
Un casu específicu de tresposición subordinada de verbu a alverbiu son les
oraciones comparatives (Xuan fala más que María), que constitúin una
mena de construcción nominal formada con un sustantivu o axetivu tantu
-a -o, o bien con un alverbiu más, menos o tanto ~ tan (nucleu de sintagma
o términu subordináu d'un axetivu o d'otru alverbiu), del que depende
como subordinada una oración trespuesta a alverbiu por que o como.
Pa cabu, ha constatase tamién el casu d'alverbios que, precedíos de preposición,
exercen la so función de subordinaos d'otru alverbiu: lloñe d'equí,
cerca d'aende, enantes d'entós, primero d'ayeri. Nesti mesmu casu atópense
alverbios interrogativos: ¿debaxo d'ónde escondieron les llaves?,
¿enriba d'ú cayeron eses peñes?, ¿al llau d'ónde?, ¿lloñe d'ú? Nestos
casos, nun se produz realmente un cambiu de categoría, pero la tresposición
fai posible que l'alverbiu funcione como términu subordináu.
2.5 Elipsis de la preposición de
La preposición de pue desapaecer en contestos definíos por estos trazos:
a) Cuando de introduz un términu subordináu con nucleu nominal acabáu
en vocal: casa de Lluis o casa Lluis, sacu de pataques o sacu pataques,
enllenu d'arena o enllenu arena, chaqueta de pana o chaqueta pana.
D'esta manera, de nun pue desaniciase cuando va precedida de consonante.
Asina, nel plural solamente se diz: les cases de Lluis, dos sacos
de pataques, enllenos d'arena, chaquetes de pana, y non *les cases
Lluis, *dos sacos pataques, *enllenos arena, *chaquetes pana.
Ha tenese en cuenta que'l desaniciu de la preposición de pue producise al
empar en dos términos subordinaos: la casa'l cura Mieres (equivalente a
la casa del cura de Mieres), Lena Xosé Víctor (equivalente a Lena de Xosé
de Víctor).