Gramática - Academia de la Llingua Asturiana

XXII.
El grupu
nominal
326
Acordies coles causes d'ufrir xéneru neutru, los referentes puen clasificase
en:
a) Referentes de daqué impreciso o xenérico: lo blanco ye símbolu de
pureza; ¡cuánto nos dixo!
b) Referentes de sustantivos non cuntables: lo blanco ("la pintura") vien
bien pa esta parea; eso ("la lleche") gústame pola vida.
c) Referentes d'otru referente neutru: ello ("lo blanco") ye símbolu de
pureza; eso ("lo que traxo Pedro") nun sé pa qué ye.
Una riestra d'elementos qu'amuesen marca de neutru o que tienen un conteníu
semánticu non cuntable, puen apaecer como referentes nes condiciones
espresaes enriba, pudiendo dir acompañaos d’axacentes neutros
dientro'l mesmu sintagma:
• Demostrativos neutros
Exemplos: ¿qué ye aquello mariello? (referencia imprecisa), apurri eso
redondo que ta enriba l'armariu (referencia imprecisa), esto ("quesu")
fresco voi llevá-ylo a Llara, aquello ("dineru") robao nun lo quixo, eso
("ropa") nuevo va estrenalo güei, eso ("filo") blanco ye pa coser.
• Pronome tónicu ello
Exemplos: pasái mañana pela oficina con ello acabao; ello, bono o malo,
ye asina, qué vas facer; vienes llueu con ello ("la ropa") llavao; ta tol
suelu enllenu d'ello ("fueya") seco; andaben con ello ("el pelo") llargo;
présta-y bañase nello ("l'agua") calentino; nun ye a prender la cocina con
ello ("carbón") moyao.
• Interrogativos y esclamativos neutros
Exemplos: nun sé qué malo se-y pue dicir; ¡cuánto feo nos dixo!; ¿qué
("vinu") tinto quies, lo d'enriba o lo d'embaxo?; ¿cuálo ("llacón") barato
quies?; ¿cuánto ("tela") blanco quier, un metru o dos?; dime cuánto
("sal") gordo hai y cuánto ("sal") fino.
• Indefiníos neutros
Exemplos: hai daqué nuevo nel discursu del alcalde; nesi caxón la policía
atopó bastante robao; nun bebas muncho ("agua") calentono; con uno
("tela") azulino y otro ("tela") collorao fizo una camisa; quédame tovía
dello ("pan") tienro.