Gramática - Academia de la Llingua Asturiana

Les siguientes menes d'axetivos puen funcionar como términos subordinaos
de concordancia neutra, esto ye, puen apaecer coles marques propies
del xéneru neutru:
• Axetivos calificativos
Nesti grupu inclúinse, amás de los axetivos calificativos, los participios y
los sustantivos axetivaos. Exemplos: quixeron engañalu con dineru falso,
la ropa mui vieyo pues vendelo, mercó un coche con dineru robao, la ropa
llavao pues ponelo en tendal, aquello esguedeyao ye de to tíu, ye una tela
hermano de lo que mercasti ayeri.
A efeutos gramaticales, tien distintu valor la -o de los axetivos neutros,
que s'opón a -u masculín y -a femenín (la lleche frío), de la -o de la terminación
alverbial resultáu d'inmovilización morfemática, como ye'l casu
de los axetivos adautaos a alverbios (elles falen mui rápido) y la de los
participios de perífrasis verbales (ellos tienen fecho coses bones).
• Axetivos demostrativos
Toles formes de los demostrativos son a funcionar como axetivos, pero les
neutres esto, eso y aquello namái pospuestes. Exemplos: el carbón esto ye
de La Camocha, nun tien nada que falar cola xente aquello.
• Axetivos posesivos
Exemplos: el carbón vueso, la ropa tuyo, la pación nuestro.
• Axetivos indefiníos
Exemplos: ye turrón abondo pa tola xente, paez tierra abondo pal tiestu,
cayó-y el pelo too, la carondia furó la madera too, nunca vi xente talo,
nun veo lleche nenguno.
• Numberales ordinales
Exemplos: la gasolina primero qu'echasti, la madera último que se quemó.
REFERENTES NA CONCORDANCIA NEUTRA
Los referentes tienen un doble comportamientu na concordancia neutra.
Per un llau, son términos principales qu'esixen neutru nun términu
subordináu; per otru llau, son términos subordinaos que deben el so
xéneru al d'otru términu que fai de principal. Asina, nel exemplu diz que
nun-y gusta la lleche pero nun pue pasar sin ello calentino, l'axetivu
calentino concuerda con ello, que debe'l so neutru a concordancia con la
lleche.
XXII.
El grupu
nominal
325