Gramática - Academia de la Llingua Asturiana

XXII.
El grupu
nominal
322
indireutu), los interrogativos y esclamativos, los indefiníos, los axetivos
sustantivaos col artículu, les secuencies artículu + preposición + sustantivu
o les secuencies artículu + que + oración. Exemplos: l'estudiante faló cola
profesora, pero ella nun-y fizo casu; si tu tienes munchos años, ¿cuántos
tien Ricardo? Sin embargu, cuando la referencia lo que fai ye individualizar
dientro d'un conxuntu, nun se produz concordancia: lleí toles noveles, pero
la que más me gustó foi ésta; conoz munchos países, pero solo ún islámicu.
2.3.2 LA CONCORDANCIA DE XÉNERU
A) LA CONCORDANCIA DE MASCULÍN Y FEMENÍN
L'axetivu concuerda col sustantivu nel mesmu xéneru, masculín o femenín,
qu'ésti amuese. Asina, por exemplu: el gafu llobu, el llobu gafu; la
llista neña, la neña llista.
Pero esto cúmplese si'l sustantivu ye cuntable. Si'l sustantivu ye non cuntable,
la concordancia de masculín o femenín namái ye posible si l'axetivu
ye antepuestu dientro'l mesmu grupu sintagmáticu; siendo pospuestu o
atributivu, l'axetivu apaez en neutru: el duru carbón, pero el carbón duro,
el carbón ta duro; la guapa ropa, pero la ropa guapo, la ropa ye guapo.
La concordancia de xéneru non solo s'establez ente nucleu sustantivu y
axetivu nes condiciones diches, sinón tamién ente'l nucleu sustantivu y los
elementos que faen referencia a él. Estos elementos de referencia puen ser
demostrativos: esi ta bien aparcáu ("coche"); de toles cases, aquella ye la
meyor; pronomes tónicos de tercera persona o pronomes átonos de tercera
persona en función de complementu direutu: nun pue pasar ensin ella
("la fía"), al entrar nél la xente salió a recibilos ("el barriu"), violu na ilesia
("al cura"), la fábrica nun la pesllaron tovía; interrogativos y esclamativos:
¿cuála tuviesti trabayando? ("estaya"), ¿cuántos fumes al día?
("pitos"); indefiníos: de los diputaos, hai dalgún que nunca fala; llegó una
a entrugame por Daniel ("periodista"); axetivos sustantivaos col artículu:
el roxu ye mui revolvín ("neñu"); ¿qué llibreta quies? —la mariella;
secuencies d'artículu el o la, preposición y sustantivu: tuvo falando cola
del quintu ("vecina"), el de Villaviciosa trai bona sidra ("llagareru");
secuencies d'artículu el o la, que y oración: el que me vendió Xuan ye bien
baratu ("paragües"), ¿nun ye la que quedó toa enfollerada? ("caleya").
B) LA CONCORDANCIA DE NEUTRU
CONCORDANCIA ANTEPUESTA
Nesta posición, los axetivos (y tamién l'artículu) namái puen apaecer en
masculín o en femenín, nun importando si'l sustantivu ye cuntable o non