Gramática - Academia de la Llingua Asturiana

XXII.
El grupu
nominal
320
2.2 Allugamientu y xerarquía de términos subordinaos
L'allugamientu del términu subordináu pue ser prenuclear (antepuestu al
nucleu) o posnuclear (pospuestu al nucleu). L'allugamientu pospuestu ye'l
normal cuando se trata d'un axetivu calificativu (la casa vieya, home
xustu, ropa blanco), d'un participiu (el problema iguáu, la xinta encargao)
o d'un sintagma trespuestu a axetivu (la casa de Xandru, home que fai xusticia).
Namái unos pocos d'axetivos calificativos llogren asitiase normalmente
delantre del nucleu (bon día, mala xugada, gran honor); el restu
tamién pue facelo, anque ye más bien propio del llinguaxe lliterariu (vieya
casa, xustu home, blanca ropa). En dalgún casu, l'allugamientu antepuestu
o pospuestu conlleva cambiu de significáu: muyer probe / probe muyer,
carbón menudo / menudu carbón.
Munchos axetivos indefiníos son a almitir l'allugamientu antepuestu o
pospuestu, magar que nesto estrémense poles sos preferencies. Ye'l casu
de abondu, bastante, cualquier, dalgún, demasiáu, más, menos, mesmu,
nengún, tal y tou; exemplos: abonda xente, xente abondo; bastante forgaxa,
forgaxa bastante; cualquier lletra, una lletra cualquiera; hai dalgún
espeyu, nun vio espeyu dalgún; demasiáu xelu, xelu demasiao; más ablanes,
poques ablanes más, menos neños, cinco neños menos; el mesmu
tren, el tren mesmu; nun atopó nengún niciu, nun atopó niciu nengún;
tales coses, coses tales; tolos collacios, los collacios toos. Lo mesmo ocurre
colos numberales ordinales (primer llibru, llibru primeru), los demostrativos
(esta ropa, la ropa esto) y los posesivos (la mio casa, la casa mio).
Sicasí, otros nun almiten más que l'anteposición: cada, dambos, daqué,
dél, demás, munchu, otru, tantu y un. Lo mesmo-yos asocede a los numberales
cardinales (dos pexes, mil años) y a los interrogativos (qué coses,
cuánta pación).
Un nucleu pue tar esplicitáu por más d'un términu subordináu. Nestos
casos, establezse un ordenamientu na so xerarquía interna. Asina, por
exemplu, en aquelles dómines murnies, l'axetivu murnies ta subordináu al
nucleu dómines, y aquelles de dómines murnies, que fai del so nucleu.
Delles observaciones ye posible facer al respeutu:
- Cuando hai subordináu antepuestu y pospuestu, el primeru ocupa davezu
la xerarquía inferior del grupu: el primer llibru escritu, bon direutor
alministrativu, grandes personaxes de la hestoria, cuatro caleyes asfaltaes,
cuántes hores perdíes.
- Los demostrativos, posesivos, numberales cardinales, indefiníos ya interrogativos
ocupen davezu la xerarquía más baxa del grupu: esti primer