Gramática - Academia de la Llingua Asturiana

II.
Les vocales
32
h) Los nomes personales na so forma hipocorística o familiar: Mari, Xeli,
Pepi, Tini, Xuani, Susi, etc. Tamién, abreviatures como bici, taxi, mini,
boli, etc.
i) Los topónimos qu'asina se pronuncien na fala popular y tradicional:
Villaperi, Lloroñi, Tresali, Albandi, Precendi, etc.
El final «-is» apaez namái en ciertes pallabres d'orixe cultu: crisis, xénesis,
peritonitis, hipótesis, etc. Formando diptongu con otra vocal precedente,
apaez en pallabres patrimoniales, como deméis, reis.
3.2.4 VOCAL FINAL -O
A efeutos normativos, escribiráse «-o» final de pallabra nos casos siguientes:
a) Nos sustantivos non cuntables fierro, pelo y filo, n'oposición a los cuntables
fierru, pelu y filu. Ver VII.2.2.
b) Nel sustantivu femenín mano.
c) N'apócopes como radio de radiotelefonía, foto de fotografía, moto de
motocicleta, metro de ferrocarril metropolitanu (nun confundir con
metru "midida"), auto de automóvil, quilo de quilogramu, micro de
micrófonu, etc.
d) Cuando'l primer elementu axetivu d’una pallabra compuesta tien terminación
vocálica velar, acaba en -o: político-relixosu o politicorrelixosu,
asturiano-lleonés o asturianolleonés, llatino-americanos o llatinoamericanos,
gallego-asturianos o gallegoasturianos, etc.
e) Nos axetivos neutros: malo, mariello, vieyino, grandono, primero,
mesmo, abondo, muncho, moyao, etc. Ver VII.3.2.
f) Nos demostrativos y posesivos neutros esto, eso, aquello, nueso, vueso.
g) Nel pronome ello.
h) Nos numberales: cero, cuatro, cinco, ocho, dieciocho. Pero cientu,
cientos.
i) Nel artículu neutru lo y nes contraiciones d'esti artículu con otros elementos:
colo, pelo, polo, tolo. Tamién, na contraición no cuando equival
a en + el o en + lo.
j) Nel pronome átonu neutru de complementu direutu lo: nun lo traxo, tráxolo,
díxomelo, etc.