Gramática - Academia de la Llingua Asturiana

II.
Les vocales
30
3.2.1 VOCAL FINAL -A
No referente a la escritura de la vocal final -a, han siguise les siguientes
observaciones:
a) Polo xeneral, la -a final caltién fixa la pronunciación [-a]. Sicasí, na
pronunciación de delles pallabres pue zarrase en [-e], y mesmamente en
[-i]. De toes maneres, la escritura del asturianu ha ser en tou casu «-a».
Exemplos: día, non *díe, *díi o *dí; puerta, non *puerte; sidra, non
*sidre; cura, non *cure; cerca, non *cerque; llegra, non *llegre; griespa,
non *griespe; lleña, non *lleñe; etc.
b) La -a final pue desapaecer en dellos axetivos femeninos antepuestos al
sustantivu: la primer casa, la tercer vegada, la postrer voluntá, anque
tamién ye posible la primera casa, la tercera vegada, la postrera voluntá.
3.2.2 VOCAL FINAL -E
Nel asturianu escritu, emplégase «-e» final de pallabra nos casos que
siguen:
a) Como norma xeneral, escríbese «-e» final, y non «-i», lo mesmo en sustantivos
que n'axetivos, alverbios, formes verbales, preposiciones, conxunciones,
etc. Exemplos: nueche, non *nuechi; lleche, non *llechi; tarde,
non *tardi; fonte, non *fonti; triste, non *tristi; verde, non *verdi; ónde,
non *óndi; frente, non *frenti; ente, non *enti; xubes, non *xubis; etc.
b) Escríbese «-e» na 3ª persona del singular del presente d'indicativu de
los verbos de la 2ª y 3ª conxugaciones, n'oposición al imperativu singular
de los mesmos verbos, que fina en «-i»: él bebe (pero bebi tu), él
cuerre (pero cuerri tu), él escribe (pero escribi tu), etc.
c) La -e final pue perdese na pronunciación si va precedida de -x- o de -sintervocáliques.
Nesos casos nel asturianu común considérase tan
correuto escribila como nun la escribir: pexe o pex, viaxe o viax, él texe
o él tex, clase o clas, frase o fras, él cuese o cues; etc. De toes maneres,
la supresión de -e nun ye posible en pallabres como orixe, aborixe, etc.,
que yá enantes perdieron una -n final.
Acordies col modelu de les formes verbales conoz, diz, merez, en delles
pallabres d'aniciu cultu enxamás hai -e final: índiz, apéndiz, héliz, pontífiz,
óniz, etc.
d) El final «-es», y non «-is», ye'l que como norma xeneral apaez na llin-