Gramática - Academia de la Llingua Asturiana

II.
Les vocales
28
(de fueu), foyasqueru (de fueya), cotarón (de cuetu), porquizu (de
puercu), nocéu (de nuez), población (de pueblu), etc.
Ye corriente, de toes maneres, que los sustantivos o axetivos con raíz en
ue caltengan el diptongu en derivaos aumentativos y diminutivos del
tipu: puercu, puerquín, puercón, puercucu; nueva, nuevina, nuevona,
nuevuca.
De la mesma manera, tamién s'escribirán con «o» átona aquelles formes
verbales rellacionaes con formes fuertes que presenten en sílaba tónica'l
diptongu ue. Exemplos: morrer (él muerre), afogar (ellos afueguen), esconder
(yo escuendo), alcontrar (yo alcuentro), correr (tu cuerres), sorber (él
suerbe), albortar (elles albuerten), alcordar (yo alcuerdo), almorzar (tu
almuerces), amagostar (ella amagüesta), colgar (ellos cuelguen), coser (yo
cueso), coyer (tu cueyes), dormir (él duerme), esfollar (ellos esfuellen), esfoyar
(yo esfueyo), folgar (tu fuelgues), forzar (él fuerza), llover (llueve),
moler (elles muelen), moyar (yo mueyo), poblar (tu puebles), poder (yo
puedo), responder (tu respuendes), sonar (ello suena), tronar (truena), volver
(ellos vuelven), etc.
Pero verbos como retueyar y otros, caltienen el diptongu en tola conxugación.
Esceición importante ye la del verbu xugar (yo xuego).
c) Nun atopando puntos de referencia como los vistos en a) y b), consultaráse
un diccionariu normativu. Asina, escríbense con «o» átona pallabres
como éstes: povisa, tocín, no ("en el", "en lo"), focicu, conceyu (y
toles qu'entamen en "con-"), corcuspín, costiella, domingu, formiga,
folixa, aforfugar, gorgutar, gorgolitu, gorrumba, morciella, moxiganga,
política, rodía, romería, solmenar, sollutu, asonsañar, todíu, torbolín,
tosquilar, xorrascar, xorrecer, zoquete, etc.
Escribiráse con «o» el prefixu átonu so- de pallabres patrimoniales: sotripar,
sofitar, sollombu, sovigañu, etc.
3.1.4 VOCAL ÁTONA U
El fonema /u/ en sílaba átona presenta, en bien de casos, realizaciones
fonétiques que van dende la [u. ] más zarrada a la [o ] más abierta, pero ha
escribise siempre «u». Exemplos: xusticia, non *xosticia; dulzura, non
*dolzura; sufrir, non *sofrir; cuchiellu, non *cochiellu; pumarada, non
*pomarada; duviellu, non *doviellu; etc.
Pa desaniciar toa dulda no que se refier a la escritura de «u» átona, puen
dase estes regles: