Gramática - Academia de la Llingua Asturiana

XXI.
Derivación
y composición
268
Ente medies ta una riestra de sufixos que puen nomase semiproductivos:
el prefixu so- "debaxo" (sobarba), el sufixu -doriu "sitiu o ferramienta pa
facer daqué" (llavadoriu, fendedoriu, bogadoriu), etc.
d) Según el so orixe, los afixos clasifíquense como patrimoniales y cultos.
Afixos patrimoniales son los que la llingua tien como herencia nel usu
popular. Ye'l casu de los prefixos como tres- (trescalar), des- (desamecer),
es- (esmigayar) o de sufixos como -ín (llibrín), -acu (homacu),
-dor (falador), -iegu (viviegu), -mientu (afogamientu), -exar (escornexar),
etc.
Pelo contrario, afixos cultos son los que s'insierten artificialmente na llingua
dende l'usu eruditu o cultu, per vía llibresca (anque llueu munchos
puedan llegar a popularizase). Ye'l casu de los prefixos hiper- (hipertensu),
semi- (semicírculu), o de los sufixos -ativu (asociativu), -ista (castellanista),
etc.
Bien de veces, un afixu d'orixe cultu coincide na espresión con ún d'orixe
popular. Asina, re- ye patrimonial en refacer, pero cultu en rexeneración;
-al ye patrimonial en castañal, pero cultu en natural; -ín ye patrimonial en
llibrín, pero cultu en bizantín; -ancia ye patrimonial en asemeyancia, pero
cultu en constancia; etc.
Convién alvertir que namái han considerase afixos les unidaes con conteníu
reconocible, reemplegables, qu’alternen el so usu col non usu, calteniendo’l
lexema’l so significáu. Polo tanto, ye prefixu an- en anaerobiu
(formáu sobre aerobiu), pero non en ánodu. De la mesma manera, hai sufixos
en llibrín y pueblón (formaos sobre llibru y pueblu), pero nun los hai
en molín y lladrón.
3.2 Sufixos
3.2.1 MENES DE SUFIXACIÓN
N'abondos casos, los sufixos faen un cambiu na categoría sintáctica a la
que normalmente s'asocia un lexema. D'esta miente, la sufixación pue ser
sustantiva, axetiva, alverbial y verbal.
A) SUFIXACIÓN SUSTANTIVA
Ye la formación de sustantivos per aciu d’un sufixu:
- Dende un axetivu: charrán ’ charranería, fatu ’ fatada, guapu ’ guapura,
llargu ’ llargor, etc.