Gramática - Academia de la Llingua Asturiana

XXI.
Derivación
y composición
266
3
Afixación o derivación: sufixos y prefixos
Los afixos son constituyentes marxinales del signu léxicu. Hai dos menes
d'afixos: los prefixos, qu'anteceden al lexema: re-facer, per-llimpiu; y los
sufixos, que siguen al lexema: muyer-ina, hom-ón. Amás, diacrónicamente
fálase de los infixos, que son elementos que s'insierten ente la raíz y los
afixos pa reforzalos. Exemplos: pan-ad-eru, test-ar-azu.
Pallabra primitiva ye la qu'apaez ensin afixu nengún; pallabra derivada ye
aquella que tien afixos. Pelo xeneral, los sufixos (non los prefixos) son
tónicos, lo que fai que provoquen un desplazamientu acentual dende la
raíz a ellos mesmos. Asina, zapatu ’ zapateru, tarde ’ tardiegu, cáscara
’ cascarina.
Un mesmu afixu pue presentar variantes d’espresión. Asina, -anza o -ancia
en asemeyanza ~ asemeyancia; lo mesmo asocede con -ientu y -entu en
famientu, fariñentu; etc.
Pa cabu, ocurre davezu qu'un mesmu sufixu pue asociase a conteníos diferentes.
Asina, -ín espresa valor diminutivu en llibrín, valor xentiliciu en
uvieín, cualidá en dañín, etc.
3.1 Clasificación de los afixos
Los prefixos y sufixos puen clasificase acordies con dellos criterios.
a) Según el so valor semánticu, los afixos puen dividise en significativos
y apreciativos. Los afixos significativos provoquen la creación d'una
pallabra de referencia oxetiva distinta a la primitiva; asina, por exemplu,
desfacer designa una aición diferente que facer, y ferreru y cuyarada
refiérense a realidaes distintes que fierro y cuyar. Pelo contrario,
la nueva pallabra que surde de l'aplicación d'un afixu apreciativu nun
designa una realidá distinta, sinón la mesma realidá valorada suxetivamente
de manera estremada. Asina, revieyu o perblancu nun se refieren
a realidaes cualitativamente distintes que vieyu o blancu, pero modulen
el so significáu.
Los sufixos diminutivos -ín y -ucu, y l'aumentativu -ón, son exemplos de
cómo dellos afixos puen recoyer al empar el valor significativu y l'apreciativu.
N'efeutu, apunten a un referente oxetivu cuando faen referencia a
"grandor" (en sustantivos) o a "intensidá" (n'axetivos y alverbios); asina, llibrín
ye "llibru pequeñu", azulín ye "daqué azul", homucu ye "home pequeñu",
gatón ye "gatu grande" y murnión ye "mui murniu". Pero cuando pasen