Gramática - Academia de la Llingua Asturiana

CONDICIONALES
SI CONDICIONAL
Exemplos: díces-ylo si la ves, si n'agostu ficiere bon tiempu vendríen munchos
turistes.
A MENOS QUE
Exemplu: nun va ayudate, a menos que-y lo pidas.
CONCESIVES
ANQUE
Contrapón dos términos calteniéndolos compatibles, pero con más intensidá
que pero. Exemplos: anque lo nieguen, eso foi asina; siempre aprueben
anque nun estudien nada; xueguen anque nun molesten. Ye frecuente
que na oración trespuesta pola conxunción nun se repita'l verbu si ye coincidente
col principal: ye caro anque bono, tán enriba anque nun sitiu fácil.
MAGAR QUE, MASQUE, POR MÁS QUE, INDA QUE
Tienen el mesmu significáu que anque. Exemplos: magar que ta murniu,
nun pierde les ganes de rir; nun-y comentes un res, masque surda'l tema;
por más que s'enfocique nun cuento face-y casu; inda que son les diez,
tovía ye de día.
3.3 Les llamaes "locuciones conxuntives"
Esiste toa una riestra d'espresiones –llamaes tradicionalmente "locuciones
conxuntives"– con carauterístiques funcionales asemeyaes a les conxunciones
subordinatives. Sin embargu, nun son conxunciones, sinón xuntures
d'otros elementos. Esti ye'l casu de les espresiones que vienen darréu:
- Preposición + que conxunción: pa que, dende que, ensin que, etc. Nel
casu de porque la secuencia preposición + que escríbese nuna sola pallabra:
ella presentó una quexa na direición porque nun-y dieron bon tratu,
falo porque quiero.
- Alverbiu + de + que conxunción: dempués de que, antes de que, primero
de que, etc.
- Alverbiu + que relativu: dempués que, antes que, siempre que, cuantayá
que, abenayá que, etc.
- Locución prepositiva + que conxunción: a condición de que, a pesar de
que, nel casu de que, a menos que, al envís de que, visto que, darréu que,
pese a que, etc.
XX.
Les
conxunciones
263