Gramática - Academia de la Llingua Asturiana

XX.
Les
conxunciones
260
2.3 Les llamaes "locuciones conectives"
Hai una riestra d'espresiones, llamaes davezu "locuciones conectives",
qu'amuesen trazos asemeyaos a les conxunciones coordinatives, como
espresar cuasi los mesmos conteníos. Son, sin embargu, alverbios de xuntura
en función de complementu circunstancial referíu a tola oración; ver
XXIII.3.8. Ye'l casu de poro, entós, d'esta miente, asina (qu'espresen consecuencia),
d'otra miente, sicasí (qu'espresen contraposición), etc. Exemplos:
l'helicópteru elévase verticalmente: poro, nun necesita d'una pista
llarga; si nun llovió nun mes, entós tien qu'haber una seca tremenda; les
partes sentáronse a negociar: d'esta miente, llograron un acuerdu de paz;
tu suélta-y les verdaes: asina, verás cómo nun gorguta; d'otra miente, les
coses van iguándose pasu ente pasu; ser yera calláu: sicasí, cuando-y
daba por falar nun paraba.
3
Conxunciones subordinatives
o trespositores
3.1 Carauterístiques funcionales
Les conxunciones subordinatives convierten una oración n'elementu
subordináu a otru nucleu verbal, funcionando dientro d'otra oración como
sustantivu, axetivu o alverbiu. Son, entós, trespositores del nucleu verbal
a otres categoríes.
A diferencia de les conxunciones coordinatives, que s'interponen, les
subordinatives inxértense nel dominiu sintácticu de la oración trespuesta.
Amás, son incompatibles cola función apellativa del verbu, esto ye, col
imperativu.
Frente a otros trespositores, como los relativos o interrogativos, les conxunciones
subordinatives nun funcionen como referentes d'otros elementos
del contestu, nin exercen función nenguna dientro la oración que tresponen.
3.2 Clasificación
3.2.1 TRESPOSITORES DE VERBU A SUSTANTIVU
Convierten una oración en sustantivu, siendo entós a exercer les funciones
pa les que ta capacitada esa categoría. Son les siguientes: