Gramática - Academia de la Llingua Asturiana

II.
Les vocales
26
c) N'otros munchos de casos, la vocal oxetu de dulda nun s'axusta a los
casos previstos enriba, polo que s'aconseya la consulta d'un diccionariu
normativu. Exemplos d'ello son estes pallabres con e átona: peñera,
ceniza, señor, vecín, vexiga, becerru, vergoña, bermeyu, cebolla, cenciellu,
centén, centollu, felechu, guedeya, llexía, mesories, mestranzu,
meyor, nenyures, seguru, segundu, selmana, asemeyar, señaldá, seronda,
seruga, teléfonu, tenyera, tenobia, etc.
d) La e- átona inicial ofrez una pronunciación [e-], qu'alterna en bien de
casos con [i-] o con [a-]. Nos siguientes exemplos escribiráse siempre
«e»: entierru, enfilar, enxamás, embelga, hermanu, etc.
Nesta situación atópense, entós, los prefixos o empiezos de pallabra en- o
em- (opuestu al cultu in-), ente- (opuestu al cultu inter-), es-, des- (opuestu
al cultu dis-), per-, tres-, re-, er-, her- y otros. Exemplos: enfariñar,
emponer "empobinar", emprestar, enanchar, enantes, enllenar, enquivocu,
entafarrar, entainar, entóncenes, entós (pero insolidariu, importante, etc.);
entemediar, entetexer (pero internacional); esmigayar, esfoyar, esconder;
desfacer, desaverar (pero distensión); perxurar; tresmanar; reteyar,
rellamber, Ernesto, ermita, hermanu, etc.
La e- átona inicial pue dacuando desapaecer na pronunciación coloquial,
pero non na escritura. D'esta miente, escribiráse en tou casu echar, escuru,
entamar y non *char, *scuru, *ntamar. Pero sí son válides les dos formes
en eléctricu o llétricu.
3.1.2 VOCAL ÁTONA I
El fonema /i/ en sílaba átona presenta, en munches ocasiones, realizaciones
fonétiques que van dende la [i.] más zarrada a la [e] más abierta.
Sicasí, ha representase na escritura cola lletra «i». Exemplos: midir, non
*medir; vistise, non *vestise; dicir, non *decir; ximir, non *xemir; ministru,
non *menistru; figura, non *fegura; etc.
Les regles que vienen darréu puen valir pa desfacer duldes de cuándo
escribir «i» átona:
a) Escríbese «i» átona cuando una pallabra remanez (o paez remanecer)
d'otra con i tónica. Exemplos: infinitu (de fin), vinagre (de vino), etc.
Les formes débiles d'un verbu escríbense con «i» átona si les formes fuertes de la
mesma conxugación lleven i tónica. Exemplos: midir (yo mido), pidir (tu pides),
dicir (él diz), rindise (ellos ríndense), siguir (yo sigo), sirvir (tu sirves), tiñir (él
tiñe), vistise (ellos vístense), ximir (yo ximo), ciñir (tu ciñes), firir (yo firo), etc.