Gramática - Academia de la Llingua Asturiana

PERO, MAS
Pero indica que se contraponen dambos términos, pero nun se refuguen
ente sí: ye caro pero bono, tán enriba pero nun sitiu fácil, xueguen pero
nun molesten. Pela so parte, mas ye sinónimu de pero, usáu namái nel llinguaxe
lliterariu: ye caro mas bono, tán enriba mas nun sitiu fácil, xueguen
mas nun molesten.
SINÓN
Necesita siempre la presencia d'una negación precedente, polo que pue considerase
en realidá la conxunción complexa nun... sinón o non... sinón. No
referente al significáu, estrémase de pero en qu'establez una contraposición
que fai incompatibles dambos términos, siendo refugáu'l primeru d'ellos.
Acordies colos distintos usos de les formes nun y non del alverbiu negativu
(ver XIV.5.1.6), danse les siguientes secuencies: nun... sinón (nun traxo
peres, sinón ablanes; nun vive cerca, sinón lloñe) y non... sinón (traxo non
peres, sinón ablanes; vive non cerca, sinón lloñe). Cuando conecta dos
verbos, cueye la forma sinón que: nun traxo peres, sinón que traxo ablanes;
nun vive cerca, sinón que vive lloñe.
N'otres ocasiones, la contraposición espresada por sinón consiste en que
daqué se presente xunto con otros fechos. Poro, esisten les secuencies non
solo... sinón (tamién) y non solo... sinón que (tamién). Exemplos: non solo
llee revistes, sinón (tamién) noveles; non solo fala francés, sinón que
(tamién) fala alemán.
2.2.4 CONXUNCIONES CONSECUTIVES
Espresen qu'ente los dos términos coordinaos, el segundu ye consecuencia
del primeru o deduzse d'él, dependiendo del orde nel que s'amuesen nel
mensaxe. Siempre enllacen oraciones. Son:
CONQUE
Exemplu: tenía abonda fame, conque entré nun restaurante y xinté; entré
nun restaurante y xinté, conque tenía abonda fame.
DE MOU QUE ~ DE MANERA QUE ~ DE MOU Y MANERA QUE
Exemplu: eso nun ye lo qu'esperaben de ti, de mou que (de manera que ~
de mou y manera que) yá pues pidi-yos perdón.
ASINA QUE
Exemplu: l'avión nun sal hasta les cinco, asina que yá podemos aburrinos.
XX.
Les
conxunciones
259