Gramática - Academia de la Llingua Asturiana

La preposición tres pue usase sola, como nos exemplos vistos, o siguida
de de. Nesti casu, la secuencia tres de pue considerase en xunto como una
sola preposición (asemeyao a lo qu'asocede con ensin). Exemplos: punxéronse
tres de la muria, cayó tres del matu, el pueblu ta tres del cordal, tres
del branu vien la seronda, tres de cenar foron dormir.
5
Preposiciones impropies
Esisten otres espresiones que, dafechu o en parte, aporten al sustantivu
significaciones de mena preposicional, exerciendo les funciones propies
de les preposiciones. Son les siguientes:
ACABANTE ~ ACABANTES
Antiguu participiu de presente del verbu "acabar", apaez nesta espresión
morfolóxicamente invariable que fai funciones preposicionales. Acompaña
siempre un infinitivu pa tresponelu a axetivu, como en el pan ta acabante
salir del fornu (atributu) o en ye pan acabante salir del fornu (axacente
nominal), o pa tresponelu a alverbiu, como en acabantes llegar púnxose
a falar (complementu circunstancial).
MENOS
Esti comparativu llogra valores preposicionales indicando'l non inxerimientu
de daqué o daquién no espresao n'otru términu de la mesma oración:
sabíenlo tolos vecinos menos Xulio.
METÁ
Trátase del sustantivu metá, qu'en delles construcciones equival a una preposición,
col significáu de "en metá de", "nel mediu de": llantóse metá'l
camín y nun dexaba pasar a naide.
METANES ~ METANOS
Tien los mesmos usos que metá. Exemplu: llantóse metanes el camín.
SACANTE ~ SACANTES
Deriváu del verbu "sacar", fai funciones preposicionales, indicando'l non
inxerimientu de daqué o daquién no espresao n'otru términu de la mesma
oración: sabíenlo tolos vecinos sacante (sacantes) Xulio.
XIX.
Les
preposiciones
253