Gramática - Academia de la Llingua Asturiana

4.15.3 OTROS EMPLEGOS
La preposición por úsase en delles locuciones alverbiales o prepositives,
como por favor, por cuenta de, pola mor de ~ por mor de, etc.
La preposición por pue atopase nel réxime preposicional de dellos verbos:
entrugar por, naguar por, esperar por, quexase por, rispir por, allampiar
por, carpir por, apostar por, mirar por, etc.
4.15.4 PER Y POR
En tou casu, tendráse en cuenta nun confundir les preposiciones per y por,
que caltienen formes y emplegos diferentes. De fechu, el so estremáu significáu
permite dixebrar oraciones como éstes: esti camín ta fechu pel pueblu
"a lo llargo'l pueblu" / esti camín ta fechu pol pueblu "foi'l pueblu'l que
lu fixo"; ¿trabayes per Asturies? "a lo llargo d'Asturies" / ¿trabayes por
Asturies? "a favor d'Asturies"; ¿por qué los faes asina? / ¿per qué camín
andes?
4.16 Según
La preposición según indica acuerdu ente dos términos. Poro, esta preposición
ye sinónima d'espresiones como acordies con, d'acuerdu con, etc.
Exemplos: van facelo según los tos conseyos; según la radio, El Puertu
Payares ta zarráu; según tu, les coses son fáciles d'iguar.
En rellación cola so condición de pallabra tónica, según pue constituyir
sintagma autónomu frutu d'una elisión verbal. Asina asocede cuando s'emplega
como respuesta: ¿Vas dir o nun vas dir? —Según. Per otru llau,
según dexa de ser preposición pa funcionar como una conxunción, como
trespositor oracional a alverbiu n'exemplos como: según venía, cruzóse
con to pá; según diz el médicu, eso cúrase faciendo deporte.
4.17 Sin o ensin
Seya nun complementu circunstancial o nun términu subordináu nominal,
la preposición sin ~ ensin ofrez siempre'l conteníu d'ausencia o privación,
polo qu'en munches ocasiones pue considerase antónimu de con. Exemplos:
el fíu ta sin la ma, café ensin zucre, nun me gusten les romeríes sin gaita
nin baille, ensin paragües nun pudo atechase, sin lleis democrátiques nun
ye posible la crítica, un perru ensin amu, paez un home sin chapeta,
acuérdense d'aquelles dómines ensin señardá, siempre diz les coses sin
que-y faigan crítiques, tán les cames ensin facer.
XIX.
Les
preposiciones
251