Gramática - Academia de la Llingua Asturiana

XIX.
Les
preposiciones
250
4.15 Por
4.15.1 FORMA
Les secuencies formaes pola preposición por y l'artículu dan llugar a les
contraiciones pol, pola, polo, polos, poles. Exemplos: pol pueblu, pola fía,
polo que sé, polos pueblos, poles fíes.
4.15.2 CONTENÍOS Y EMPLEGOS
La preposición por amuesa los siguientes conteníos y emplegos:
a) Causa o motivu: posóse del autobús pola to culpa, eso facémoslo por
defender los fíos. Cuando por va siguíu d'una oración sustantivada por
que, la secuencia por + que escríbese nuna sola pallabra: eso facémoslo
porque defendemos los fíos.
b) "A favor de": ellos votaron pol so candidatu, la llucha pola vida.
c) Mou o manera: lleváronlu a la policía pola fuerza.
d) Complementu axente: esti armariu foi fechu pol carpinteru, un actu
presidíu pola conseyera.
Arriendes d'estos emplegos, la preposición por, en contestos específicos,
vese arrodiada de significaciones diverses:
- Con verbos de direición, "en cata de", "en busca de": foron por él, pero
nun lu atoparon; vieno a mio casa poles perres.
- Con infinitivu, indica qu'una aición entá nun se fizo o que ta a puntu de
facese: tán les cames por facer; tien tolos problemes por iguar; toi por
dicí-yoslo, pero nun m'atrevo.
- Preciu o valor en contestos qu'a ello faen referencia: mercólu por mil
pesetes, ye un armariu vendíu por pocu preciu.
- "En cuentes de", "en llugar de", "en calidá de", "como": mercólu por
bonu, pero yera de mala calidá; diéron-y ún por otru; faló María por
Xuan.
La preposición por ye la emplegada pa espresar cantidá pola que se multiplica
daqué: tres por cuatro son doce, multiplicái siete por nueve.
Cuando por ye índiz funcional de suplementu (ver XXIII.3.4), cuasi que
ta fallida de conteníu, teniendo namái un puru valor gramatical: naguaben
por figos. Nestos casos, cuando por va siguíu d'una oración sustantiva en
función de suplementu, la secuencia por + que escríbese en pallabres
xebraes: naguaben por que-yos dieran figos.