Gramática - Academia de la Llingua Asturiana

En munches ocasiones podrá duldase de si la vocal átona qu'hai qu'escribir
ye una «e» o una «i». Col oxetu d'iguar eses duldes, puen dase les
siguientes regles:
a) Escríbese «e» átona en pallabres derivaes (o sentíes como tales) d'otres
que lleven e tónica. Exemplos: pequeñín (de pequeñu), neñín (de neñu),
llecherina (de llechera, de lleche), pegañosu (de pegar), teyáu (de teya),
abeyera (d'abeya), etc.
Les formes débiles d'un verbu habrán escribise con «e» átona si les correspondientes
formes fuertes lleven e tónica. Exemplos: secar (yo seco), enllenar
(tu enllenes), xelar (xela), meter (ellos meten), velar (yo velo), averar (tu
averes), besar (él besa), fregar (ellos freguen), pescar (yo pesco), mercar (tu
merques), cebar (ella ceba), cenar (elles cenen), deber (yo debo), dexar (tu
dexes), guetar (él gueta), llevar (ellos lleven), esmenar (yo esmeno), esmesar
(tu esmeses), mexar (él mexa), mecer (ellos mecen), pecar (yo peco), pegar
(tu pegues), pelar (él pela), pesar (elles pesen), quedar (yo quedo), quemar
(tu quemes), quexase (él quéxase), remar (ellos remen), rezar (yo rezo),
semar (tu semes), texer (él texe), etc.
b) Escríbese «e» átona en pallabres que se deriven (o se sienten derivaes)
d'otres primitives onde en sílaba tónica apaeza'l diptongu ie. Exemplos:
culebrizu (de culiebra), ferruñosu (de fierro), aveyuscáu (de vieyu),
melgueru (de miel), cegatu (de ciegu), dentiquín (de diente), cebatu (de
ciebu), etc.
De toes maneres, los sustantivos o axetivos que tienen na raíz un diptongu
tónicu ie, suelen caltenelu en derivaos con sufixos productivos aumentativos
y diminutivos del tipu: tierra, tierrina, tierrona, tierruca; vieyu,
vieyín, vieyón, vieyucu.
De mou asemeyáu, escríbense con «e» átona les formes verbales rellacionaes
con formes fuertes que presenten en sílaba tónica'l diptongu ie.
Exemplos: sentir (yo siento), alvertir (tu alviertes), pesllar (él pieslla),
venir (ellos vienen), espertar (yo espierto), ximelgar (tu ximielgues),
alendar (ella alienda), amestar (yo amiesto), apegar (él apiega), camentar
(yo camiento), deprender (tu depriendes), enredar (él enrieda),
enrestrar (tu enriestres), enterrar (él entierra), feder (ellos fieden),
ferrar (yo fierro), ferver (tu fierves), merendar (ella merienda), prender
(ellos prienden), querer (yo quiero), tener (tu tienes), vender (él viende),
etc. Pero verbos como ufiertar, avieyar caltienen el diptongu en tola conxugación.
II.
Les vocales
25