Gramática - Academia de la Llingua Asturiana

XIX.
Les
preposiciones
242
4.6 Contra o escontra
4.6.1 FORMA
Nel asturianu escritu, dambes formes, contra y escontra, son equivalentes
dafechu: contra la muria o escontra la muria, contra la inxusticia o escontra
la inxusticia.
4.6.2 CONTENÍOS Y EMPLEGOS
La preposición contra o escontra ofrez el significáu básicu de cercanía
respeuto d'un puntu de referencia fixu. Asina, pue espresar:
a) Asitiamientu en llugar aproximadamente cercanu a otru; equival a les
espresiones alverbiales xunto a, al llau de. Exemplos: esos conceyos
tán contra Galicia, tán pa escontra aquella peña, ponte contra la
muria. Pue axuntar la idea de movimientu: caminaben contra la mar,
el volador disparáronlu contra'l cielu. En sentíu figuráu del anterior,
equival a cuasi: la to saya tira contra encarnada, tien una pita escontra
roxa.
b) Oposición, seya en sentíu material o en sentíu figuráu: punxéronse toos
contra l'alcalde.
c) Al alcuentru de, hacia: el neñu salió de casa contra'l padre, toos corrieron
escontra la furgoneta del pan.
4.7 De
4.7.1 FORMA
La preposición de toma la forma apostrofada d' cuando-y sigue cualquier
pallabra qu'entame per vocal o per h- muda: d'Asturies, d'entrugar, d'iguar,
d'orbayu, d'untu, d'harmonía, d'hermanu, d'hidróxenu, d'home, d'humor.
Cuando-y sigue l'artículu el forma la contraición del: la casa del vecín, el
fíu del alcalde.
4.7.2 CONTENÍOS Y EMPLEGOS
Cuando la preposición de apaez como índiz funcional de complementu
circunstancial (ver XXIII.3.6), amuesa la mayor variedá de conteníos:
a) Llugar de procedencia, d'orixe: Xuan vien d'Uviéu, baxaron del monte
al atapecer. Procedencia u orixe en sentíu figuráu: les idees de Pedro
vienen de la indignación, salió-yos fuerza del convencimientu que teníen.
Con referencia temporal: l'Estáu modernu vien de la Revolución
Francesa, el cursu dura d'ochobre a xunetu.