Gramática - Academia de la Llingua Asturiana

1
Les preposiciones
Formes
Les preposiciones son elementos de rellación gramatical que —dotaos
d'una carga semántica mui llixera— empléguense pa conseñar la función
sintáctica d'un sintagma o pa capacitar a un sintagma pa exercer funciones
que de mano nun son les propies.
Les preposiciones son: a, ante ~ énte, baxo, cabo ~ co, con, contra ~ escontra,
de, dende, en, ente, hasta ~ fasta, hacia ~ haza, pa, per, por, según, sin
~ ensin, so, sobre ~ sobro y tres.
Les preposiciones son pallabres invariables. Son tamién (cola única esceición
de según) pallabres átones, lo que quier dicir que se sofiten siempre
nel acentu del sustantivu que-yos sigue; darréu d'ello, nenguna preposición
pue formar enunciáu completu ella sola.
En contautu con otres pallabres, delles preposiciones pierden dalgún
soníu. Esto indícase, según los casos, col usu del apóstrofu (d'entós,
n'Asturies, p'afayar) o formando contraiciones, que puen ser de preposición
y artículu (del carbayu, col amigu, pela ventana), de preposición y
demostrativu (nesti llugar, naquella dómina), de preposición ya indefiníu
(nun minutu, nunes bones condiciones), de preposición y pronome (creyemos
nél, enfóteste nello), de preposición y preposición (an ca María, pente
la sebe) y de preposición y alverbiu (penriba, pequí).
2
Conteníos
XIX
Les preposiciones, en principiu, asóciense a conteníos concretos, de manera
que la sustitución d'unes por otres produz camudamientos de significáu
claros. Vese asina, por exemplu, cuando la preposición indica función de
complementu circunstancial (falen con María, falen contra María, falen
por María, etc.) o de subordináu nominal (xente con dineru, xente de dineru,
xente sin dineru, etc.).
Nesti sen, les preposiciones amuesen davezu significaos como los d'allugamientu
nel espaciu o nel tiempu, direición, finalidá, procedencia, causa,
mediu, instrumentu, compaña y otros.
XIX.
Les
preposiciones
235