Gramática - Academia de la Llingua Asturiana

XVIII.
Interrogativos
y esclamativos
234
Como sustantivu, en plural pue emplegase en masculín o femenín: ¿pa
cuántos ye esti dineru?, ¿cuántes van dir a la cena? Pero en singular
namái apaez en neutru: de lleche, ¿cuánto te pongo?; ¿cuánto traxeron pa
nós? (referencia a "carbón").
2
Los esclamativos
Los esclamativos son axetivos, pronomes o alverbios que s'empleguen pa
enfatizar un conteníu nes oraciones esclamatives, no que se refier a aspeutos
referentes a la identidá (qué, quién, cuál cuála cuálo), al llugar (ónde,
ú), al tiempu (cuándo), al mou (cómo) o a la cantidá (cuántu -a -o) de dalgun
elementu de la oración.
Como se ve, el repertoriu d'esclamativos ta formáu polos mesmos miembros
que'l d'interrogativos. Les sos formes y les sos funciones son les mesmes.
Namái s'estremen nestos detalles:
a) Los esclamativos úsense siempre n'oraciones con entonación esclamativa
o almirativa (na escritura, oraciones ente signos d'almiración ¡!).
b) L'esclamativu ú nun almite les construcciones ú más sustantivu nin ú
más lu la lo los les, permitíes nel casu del interrogativu.
Exemplos d'esclamativos: ¡qué quedrá esi babayu!; ¡qué llibru más raru!;
¡qué prestosu ye esi llibru!; ¡quién sería'l que faló!; ¡a quién vería en conciertu!;
¡cuál (cuálu) sería'l meyor, Dios míu!; ¡ónde taríes! o ¡ú taríes!;
¡pa ónde diríes! o ¡pa ú diríes!; ¡cuándo vien a dicínoslo!; ¡cómo trabaya!;
¡cuántes vegaes te lo encamentó y nun-y fixisti casu!; ¡cuánto quier
a los fíos!