Gramática - Academia de la Llingua Asturiana

XVIII.
Interrogativos
y esclamativos
232
Como yá se dixo, exerciendo de sustantivu, nel masculín tien dos formes
equivalentes dafechu: ¿cuál ye'l tuyu? o ¿cuálu ye'l tuyu? Como axetivu
antepuestu al sustantivu, namái pue apaecer la forma cuál: ¿cuál rapaz?
(non: *¿cuálu rapaz?). Como axetivu, l'interrogativu cuál siempre s'alluga
antepuestu al sustantivu. Poro, como axetivu nun pue usase la forma neutra
cuálo.
Convién tener en cuenta que, siendo'l del axetivu un usu posible de cuál,
esi cometíu cúmplelu normalmente qué. Véanse, entós, les equivalencies:
¿cuál rapaz te dixo eso? equival a ¿qué rapaz te dixo eso?; ¿cuála rapaza
te dixo eso? ye equivalente a ¿qué rapaza te dixo eso?; ¿cuál carbón te
traxeron? ye lo mesmo que ¿qué carbón te traxeron?; ¿cuála lleña echaron
al fueu? ye igual que ¿qué lleña echaron al fueu?; ¿cuálos rapazos te
dixeron eso? val tanto como ¿qué rapazos te dixeron eso?; ¿cuáles rapaces
te dixeron eso? equival a ¿qué rapaces te dixeron eso?
Como sustantivu, l'interrogativu cuál ~ cuálu cuála cuálo emplégase como
un referente d'un elementu presente en testu o en contestu: ¿cuál (cuálu)
ye fíu d'Olaya? (referencia a "rapaz"); ¿cuálu, ho?; ¿cuála de les tos sobrines
estudió drechu?
Si la referencia ye a un elementu non cuntable, l'interrogativu apaez en
neutru: ¿cuálo vos gusta más, lo con gas o lo sin gas? (referencia a
"agua"); nun sabe cuálo ye meyor, si'l plásticu o'l papel. Ver XXIV.
4.1.1.
Cuál ~ cuálu cuála cuálo siempre fai referencies testuales o contestuales,
pero nunca referencies imprecises o xenériques. Esto quier dicir qu'entrugues
como ¿cuál?, ¿cuálo?, etc., nun puen facese si de mano nun se faló
yá de daqué o daquién. Esta ye una de les mayores diferencies respeuto del
interrogativu qué, que sí permite la referencia imprecisa o xenérica (¿qué
ye l'home?).
1.4.4 ÓNDE, Ú
Los interrogativos ónde y ú empléguense pa entrugar pol llugar nel qu'asocede
una aición verbal. Por esti motivu, ónde y ú siempre son alverbios,
exerciendo la función de complementu circunstancial con valor locativu:
¿ónde faen el baille? o ¿ú faen el baille?; ¿ónde viven agora? o ¿ú viven
agora?; nun saben ónde se meter o nun saben ú se meter.
Nos usos non preposicionales, ú tien la forma alternativa aú: ¿aú faen el
baille?, ¿aú viven agora?, nun saben aú se meter.