Gramática - Academia de la Llingua Asturiana

1.4 Función y emplegu
Los interrogativos siempre cumplen una función dientro la oración na que
s'atopen. Acordies con esto, los interrogativos puen ser sustantivos, axetivos
o alverbios:
- Ye sustantivu: quién.
- Son sustantivos y axetivos: qué, cuál.
- Son alverbios: ónde, ú, cuándo, cómo.
- Ye sustantivu, axetivu y alverbiu: cuántu.
Na llingua coloquial, ye frecuente que les oraciones interrogatives se formulen
con refuerzos enfatizadores que dependen del interrogativu. Nesti
sen, les soluciones concretes puen ser abondoses: ¿quién degorrios ye
esi?, nun sé qué narices diz, etc.
1.4.1 QUÉ
L'axetivu o pronome interrogativu qué úsase pa entrugar por daqué impreciso
o xenérico (¿qué quies?) o por una mena determinada de coses, animales
o persones (¿qué llibros quies?). Véase nestos exemplos: ¿qué llibru
quies?; nun sabemos qué llibru quies; ¿qué xata nació anueche?; queremos
saber qué xata nació anueche; ¿qué alumnes son les que más estudien?;
entrugaron qué alumnes son les que más estudien. Nesti sentíu, obsérvase
que l'interrogativu qué, cuando ye axetivu, lo mesmo pue referise a coses,
animales o persones, pero cuando ye sustantivu siempre fai referencia a
coses: ¿qué quies?; ¿qué te pasó?; nun sabe qué-y dexaron en buzón.
Nos casos d'usu sustantivu, emplégase tamién la secuencia el qué baxo
estes condiciones: apaecer namái n'interrogatives direutes; funcionar ensin
preposición, o seya, como suxetu o complementu direutu. Exemplos: ¿el
qué?; ¿el qué vos gusta más, el café o'l chocolate?; ¿el qué te dixo?
1.4.2 QUIÉN
Como yá se dixo, l'interrogativu quién, que siempre ye sustantivu, estrémase
de qué en que fai siempre una referencia personal. Convién tener en cuenta
que quién ye singular o plural, pero nun presenta marques esternes de
númberu: ¿quién ye esi que ta falando?; ¿quién son esos que tán falando?
1.4.3 CUÁL CUÁLA CUÁLO
El sustantivu y axetivu interrogativu cuál ~ cuálu cuála cuálo emplégase
pa facer una entruga sobre persones, animales o coses d'un conxuntu yá de
mano conocíu nel actu de fala.
XVIII.
Interrogativos
y esclamativos
231