Gramática - Academia de la Llingua Asturiana

1
Les vocales
Sistema vocálicu
El sistema vocálicu del asturianu compónse de cinco unidaes fonolóxiques,
estructuraes en tres graos d'abertura y tres allugamientos. Acordies
con esto, los sos trazos distintivos son los que s'especifiquen darréu:
/a/ vocal d'abertura máxima y allugamientu central
/e/ vocal d'abertura media y allugamientu anterior (palatal)
/i/ vocal d'abertura mínima y allugamientu anterior (palatal)
/o/ vocal d'abertura media y allugamientu posterior (velar)
/u/ vocal d'abertura mínima y allugamientu posterior (velar)
D'esta manera, el sistema vocálicu del asturianu pue representase gráficamente
asina:
ANTERIORES CENTRALES POSTERIORES
ZARRAES i u
MEDIES e o
ABIERTES a
El valor distintivu d'estes vocales pue vese nos siguientes exemplos: sacu /
secu, llanu / llinu, fala / fola, llana / lluna, pena / pina, techu / tochu, cena /
zuna, pisu / posu, lliria / lluria, foria / furia.
En sílaba átona amenorga la frecuencia d'oposiciones vocáliques, especialmente
e/i y o/u, por más que nun se desanicien dafechu: palada / pelada,
tacada / tocada, pecar / picar, petar / pitar, corar / curar, colada / culada,
etc.
2
Variantes fonétiques
Caúna de les vocales presenta una serie de realizaciones fonétiques, cuasi
siempre condicionaes polos soníos del entornu. Estes realizaciones fonétiques
tán desprovistes de tou valor distintivu, polo que nun tienen nenguna
pertinencia fonolóxica.
II
II.
Les vocales
23