Gramática - Academia de la Llingua Asturiana

1
Interrogativos
y esclamativos
Los interrogativos
XVIII
Llámense interrogativos una mena de pallabres nes que s'afita l'atención
d'una entruga alredor de delles informaciones concretes.
1.1 Carauterístiques xenerales de los interrogativos
Los interrogativos son sustantivos, axetivos o alverbios que s'empleguen
p'amosar dalgún conteníu que requier respuesta en dellos aspeutos referentes
a la identidá (qué, quién, cuál cuála cuálo), al llugar (ónde, ú), al
tiempu (cuándo), al mou (cómo) o a la cantidá (cuántu cuánta cuánto) de
dalgún elementu de la oración.
El conteníu interrogativu pue manifestase en dos menes d'entrugues: les
direutes y les indireutes. Entrugues direutes son les oraciones acompañaes
d'una entonación carauterística llamada entonación interrogativa y
representada na escritura per aciu de los signos d'interrogación o d'entruga
(¿?).
Nestes entrugues —y acordies cola so condición de sustantivu, axetivu o
alverbiu— l'interrogativu nun trespón la oración a otra categoría sintáctica.
Exerce, pela cueta, una función determinada dientro la oración, como
pue ser la de subordináu nominal (¿qué tiempu fai?), suxetu léxicu
(¿quién fizo esto?), complementu circunstancial (¿ónde tán les
llaves?), etc. Amás, nestes entrugues l'interrogativu preséntase como'l
focu d'atención de la oración.
Pela so parte, les entrugues indireutes nun s'asocien a la entonación interrogativa,
polo qu'enxamás apaecen na escritura colos signos d'entruga,
anque los interrogativos son tónicos y escríbense con acentu gráficu.
Los interrogativos nelles presentes son trespositores d'oración a la categoría
de sustantivu. N'efeutu, convierten una oración en sustantivu, exerciendo
oración tala una función sustantiva dientro d'otra oración. Asina,
nes oraciones nun sé qué tiempu fai, nun sé quién fizo esto, nun sé ónde
tán les llaves, les oraciones sorrayaes funcionen como complementu
direutu del verbu saber.
XVIII.
Interrogativos
y esclamativos
229