Gramática - Academia de la Llingua Asturiana

XVII.
Los relativos
228
variación de númberu, anque sí ye posible la so combinación con verbu en
singular o plural; tamién concuerda con masculín y femenín, anque nun
amuesa marques carauterístiques de xéneru. Úsase namái ensin antecedente,
anque pue tar precedíu de preposición: quien nun paez asturiana ye
Milina, a quien vimos picando na rampla ye a esos mineros, a quien nun
convién dicir nada ye a Pelayo, de quien faló ye del cuñáu, quien son del
país sábenlo bien.
4.3 Onde y u
Onde y u (tamién au), como relativos, presenten una equivalencia total en
funciones y emplegos. Ensin preposición equivalen en toles ocasiones a la
secuencia en + artículu + que, como se ve nestos exemplos: el pueblu onde
vivo ye perguapu equival a el pueblu nel que vivo ye perguapu; los pueblos
u hai trabayu tienen vida ye equivalente a los pueblos nos qu'hai trabayu
tienen vida; la fábrica u faen esos zapatos tuvo que zarrar ye lo
mesmo que la fábrica na que faen esos zapatos tuvo que zarrar; les fábriques
onde faen esos zapatos tuvo que zarrar val tanto como les fábriques
nes que faen esos zapatos tuvo que zarrar; l'agua onde metí les manes
taba ferviendo equival a l'agua no que metí les manes taba ferviendo.
4.4 Cuantu
Presenta marques de xéneru (masculín, femenín y neutru) y númberu (singular
y plural): cuantu cuanta cuanto, cuantos cuantes. Úsase siempre
ensin antecedente. Pue funcionar como axetivu o como sustantivu.
Cuando ye axetivu, precede siempre a sustantivos, nun pudiendo concordar
en neutru: cuantu pan mercó comiólo too, cuanta más allegría tienen
más canten, regalaron llibros a cuantos escolinos-yos los pidieron, rióse
de cuantes persones foron vela. Cuando ye sustantivu sí pue referise en
neutru a non cuntables: cuanto mercó comiólo too, cuanto más tienen más
quieren, regalaron llibros a cuantos-yos los pidieron, rióse de cuantes
foron vela, nun tien cuanto fai falta.