Gramática - Academia de la Llingua Asturiana

XVII.
Los relativos
226
1
Los relativos
Formes
Los relativos son elementos gramaticales que, con estremaos valores
semánticos y comportamientos sintácticos, faen posible qu'una oración
llegue a exercer les funciones propies d'un términu subordináu.
Los relativos son que, quien, onde, u ~ au, como, cuando y cuantu -a -o.
Los relativos son pallabres átones, n'oposición a los interrogativos y esclamativos,
que coinciden na forma, pero son tónicos, fechu que nel so casu
refléxase na escritura per aciu d'un acentu gráficu.
El relativu que, cuando-y sigue pallabra qu’entama per vocal (o h-), pierde
la vocal, reflexándose na escritura con un apóstrofu. Por exemplu: son
collacios qu'anden xuntos.
2
Carauterístiques xenerales
XVII
Los relativos convierten pelo xeneral una oración nun elementu dependiente
d'un sustantivu (les fueyes que cayeron del árbol enllenaron el
suelu), d'un axetivu (lo vieyu que yera sabíenlo toos) o d'un alverbiu
(siempre que vien traivos regalos) pudiendo entós oración tala exercer les
funciones propies del axetivu. Poro, los relativos son trespositores d'oración
a axetivu o a alverbiu. Sobre la sintaxis de les oraciones relatives, ver
XXV.22.
Per otru llau, los relativos son pronomes, darréu que faen referencia a un
sintagma nominal, allugáu fuera de la oración trespuesta a la que precede.
Al mesmu tiempu, exercen una función dientro la oración trespuesta.
Exemplos: les fueyes que cayeron del árbol llevóles l'aire (suxetu); la
casa onde viví de neñu vendíla yá (complementu circunstancial); la escuela
u trabaya Xuan van zarrala (complementu circunstancial); l'añu cuando
se casaron hebo una seca tremenda (complementu circunstancial).
Pue aportar que la oración trespuesta apaeza ensin antecedente. La oración
trespuesta, entós, funciona como un sustantivu o como un alverbiu; ver
XXIII.3.7.2. Exemplos: onde teas fai lo que veas; u vayáis, sei amables
cola xente; ponéivos como vos preste; cuando se casaron hebo una seca