Gramática - Academia de la Llingua Asturiana

XVI.
El verbu
222
HABER QUE + INFINITIVU
Perífrasis d'obligación. Úsase solamente en 3ª persona del singular y referida
a obligaciones que remanecen de persones (nunca d'animales o
coses). Exemplos: hai qu'aconceyar a tolos vecinos mañana, había que
falar col conseyeru mañana mesmo, habrá qu'aguardar dos díes más pa
semar.
LLEGAR A + INFINITIVU
Perífrasis terminativa. Espresa que l'aición fina nun puntu temporal concretu
y d'un mou determináu, que supón l'empiezu d'otra aición consecutiva.
Exemplos: teníen tantes duldes que llegaron a entrugá-ylo al abogáu,
pasaben tanta fame que llegaben a comer pulgos.
PARAR DE + INFINITIVU
Indica acabación d'una aición. Exemplos: cuando veníes paró de facer sol,
parastis de cantar porque-yos molestaba.
PODER + INFINITIVU
Tien dos significaos. Espresa capacidá pa facer daqué: si me dexáis yo
puedo acostinar con esa caxa, nun pues comer esi platáu tan grande.
Tamién espresa posibilidá de que daqué asoceda: nun t'enfotes nél porque
pue ocurríse-y cualquier cosa, mañana pue nevar.
SER A + INFINITIVU, SER PA + INFINITIVU
Espresa capacidá de facer daqué. Exemplos: yes a facelo (yes pa facelo)
de sobra, tas tan cansu que nun yes a subir (nun yes pa subir) esa cuesta,
nun yéremos a abrir (nun yéremos p'abrir) los güeyos, ¿Xuan ye a facelo
(ye pa facelo) él solu?, si sois a convencela... (si sois pa convencela...).
SER QUIEN A + INFINITIVU, SER QUIEN PA + INFINITIVU
Equival a la perífrasis anterior, pero con un usu restrinxíu a persones.
Exemplos: nun yes quien a subir (nun yes quien pa subir) esa cuesta, nun
yéremos quien a abrir (nun yéremos quien p'abrir) los güeyos, ¿Xuan ye
quien a facelo (Xuan ye quien pa facelo) él solu?, si sois quien a convencela
(si sois quien pa convencela)..., les neñes nun son quien a xugar (nun
son quien pa xugar).
TAR PA + INFINITIVU
Espresa qu'una aición ta percerca de producise; úsase referida a suxetos
inanimaos. Exemplos: ta pa llover, esa muria ta pa cayer.