Gramática - Academia de la Llingua Asturiana

I.
L’alfabetu
20
2.9 El puntu
El puntu ( . ) úsase pa indicar una pausa más llarga que la señalada pola
coma. Puen estremase: el puntu siguíu, cuando la pausa nun supón nengún
camudamientu nel tema concretu que se ta desendolcando; el puntu aparte,
cuando tres de la pausa se camuda d'asuntu; y el puntu final, que marca
l'acabamientu total del testu.
El puntu emplégase tamién nes abreviatures: Sr. "señor", Sra. "señora", D.
"don", p. ex. "por exemplu", etc. "etcétera", X. "Xuan" y otres.
2.10 El puntu y coma
El puntu y coma ( ; ) amuesa una pausa mui asemeyada a la del puntu, pero
reflexa una mayor rellación semántica ente los elementos ente los que s'insierta.
2.11 Los dos puntos
Los dos puntos ( : ) indiquen tamién una pausa en casos como estos:
a) Encabezando una enumeración. Exemplu: tuvieron tres fíos: Manuel,
Llara y Xulio.
b) Presentando daqué que fai d'exemplu, conclusión, causa o consecuencia.
Asina: eso ye lo que vos mata: la envidia; islles son los territorios
arrodiaos d'agua per toles partes, por exemplu: Sicilia y Cuba; al otru
día decatáronse d'ú veníen les voces: de dientro la casa; nun foi a
aguantar aquel perru: vendiólu.
c) Presentando la reproducción de daqué n'estilu direutu: entós alzóse y
díxo-yos: "nun pue un home ser llibre baxo condiciones tales".
d) Darréu del saludu al entamar una carta: Estimáu amigu: Anque fai
abondu tiempu que nun t'escribo...
2.12 Los puntos suspensivos
Los puntos suspensivos ( …) úsense a la fin d’un enunciáu, ya indiquen,
ente otros usos:
a) Una oración non peracabada: asegurónos que diba facelo, pero...
b) Una enumeración non peracabada: taba ellí tola xente: el pá, la ma, los
fíos, el cuñáu...