Gramática - Academia de la Llingua Asturiana

como tou sustantivu, l'infinitivu pue tresponese a la categoría d'axetivu (la
hora de falar) o d'alverbiu (bonu d'aguantar, enantes de dir).
El calter sustantivu del infinitivu manifiéstase tamién na posibilidá de dir
acompañáu d'artículu y otros determinantes, lo que ye posible sobre manera
cuando funciona como suxetu léxicu (el pesllar con llave dexólu mui
tranquilu, esi chisgar los güeyos tan prestosu). Nestos casos, l'artículu tien
un valor puramente estilísticu, nun amestando nengún significáu. Como
sustantivu, l'infinitivu pide concordancia neutra del axetivu o pronome
cuando concuerden con él (ver XXIV.4.1.1): fumar ye malo, el fumar
dexólo.
Cuando l'infinitivu se lexicaliza como sustantivu dafechu, dexa de ser propiamente
una xuntura de lexema verbal y derivativu, pa presentar yá toles
carauterístiques del sustantivu, almitiendo singular y plural llibremente
(l'andar / los andares, l'atapecer / los atapecer, el riscar / los riscares, el
cantar / los cantares) y posibilidá d'acompañase de derivativos o sufixos
(l'andarucu, l'atapecerín, el cantarón...).
Semánticamente, l'infinitivu espresa procesu potencialmente en marcha,
pero ensin referencia al so acabamientu. Poro, l'infinitivu tien un claru
valor progresivu, al disponer de tola so carga semántica llista pa desendolcase
nun futuru. Ye por esto polo que l'infinitivu entra davezu a formar
parte de perífrasis verbales qu'impliquen valor progresivu (ver
XVI.14.1): voi facer, has comer, hai qu'igualo, tien que dir, tenemos de
dicí-ylo, etc.
10.3.1 DELLOS USOS DEL INFINITIVU
L'infinitivu úsase pa sustituyir a una forma conxugada y asina evitar la
repetición de la persona gramatical. Nunes ocasiones, l'infinitivu ye la
única forma posible: quiero dir (non *quiero que yo vaya), nun tienes un
res que perder (non *nun tienes un res que pierdas). N'otres ocasiones,
l'infinitivu alterna nel usu con una forma conxugada de suxuntivu: fáeslu
dicir mentires (equivalente a fáeslu que diga mentires), el caballu que
cayó paez llevantase otra vegada (equivalente a paez que se llevanta),
obligónos a trabayar tola mañana (equivalente a obligónos a que trabayáremos),
mandóte llimpiar el cuartu (o mandóte que llimpiares el cuartu),
nieguen ser ellos (equivalente a nieguen que son ellos). Véanse tamién
los siguientes exemplos: con nós facelo ye bastante (equivalente a con que
nós lo faigamos ye bastante), con nós facelo yera bastante (equivalente a
con que nós lo ficiéremos yera bastante), llevantéme sin ellos notar nada
XVI.
El verbu
185