Gramática - Academia de la Llingua Asturiana

El calter imperfeutivu o de non peracabamientu de l'aición pue entendese
como aición que dura nel so procesu (aquella mañana llovía ensin parar,
vivíen bien naquel pueblu) o nuna aición puntual que se repite a mou de
procesu (aquella xente cantaba perbién, los domingos díbemos a misa).
De la noción d'aición non peracabada pue pasase a la improbabilidá, y
d'aende a espresar la non realización. Por exemplu, trayíenvos los regalos
nun especifica si l'aición tuvo o non un final o cumplimientu (frente a traxéronvos
los regalos, onde'l cumplimientu ye efeutivu), polo que pue
entendese como una realización probable (trayíenvos los regalos si pudieren,
equivaliendo al condicional trayeríenvos) o como una non realización
(trayíenvos los regalos, pero nun vos los traxeron).
El pretéritu imperfeutu d'indicativu úsase muncho al entamar una narración:
ello yera una vez..., había una vegada un rei...
9.4 Pretéritu pluscuamperfeutu
El pretéritu pluscuamperfeutu tien, en tolos verbos, les mesmes formes
que'l pretéritu imperfeutu de suxuntivu. Refierse a una aición que s'alluga
nun momentu anterior a otra pasada que se toma como referencia: cuando
yo llegué él nun entamara a falar, al salir del cine yá atapeciera.
9.5 Presente de suxuntivu
El presente del mou suxuntivu pue amosar les siguientes referencies:
- Fechos d'un presente puntual: nun creyo que seyan les dos.
- Fechos d'un presente ampliu: nun me paez que'l mio cuñáu trabaye de
repartidor.
- Pasáu cronolóxicu: nun abro anque piquen a la puerta, anque Xovellanos
seya'l primeru que s'ocupe del estudiu del asturianu..., pa que'l llunes
pasáu me presente na oficina fizo falta llamame.
- Futuru cronolóxicu: quiera Dios que nos veamos mañana, eso oblíganos
a que'l mes que vien xuntemos a tolos vecinos.
- Fechos pasaos, presentes y futuros (presente habitual): nun hai motivu pa
que los llunes trabayemos menos hores.
- Indistinción o indefinición cronolóxica: la inclinación de la exa terrestre
fai que n'iviernu tapeza antes, el fechu de que la ballena seya un
mamíferu nun significa que tea cubierta de pelo.
XVI.
El verbu
181