Gramática - Academia de la Llingua Asturiana

XVI.
El verbu
176
do ves coses asina quedes fríu (en cuentes de cuando veo coses asina
quedo fríu o cuando ves coses asina quedes fríu); y mesmamente la 1ª del
plural: facemos lo que podemos (en cuentes de faigo lo que puedo o faes
lo que pues).
Pola mor de la referencia que faen na realidá, dellos verbos —que tradicionalmente
reciben la denomación d'impersonales— úsense normalmente
na 3ª persona del singular; esto asocede, por exemplu, colos qu'espresen
fenómenos meteorolóxicos: llueve, orbayaba, xarazó, nevará, xela,
tuena, etc. Sobre la impersonalidá, ver XXIII.3.1.4.
5
El mou
El morfema verbal de mou básase na consideranza de los fechos espresaos
como reales o non. Estrema los siguientes términos: mou indicativu
(qu'espresa realidá), mou suxuntivu (qu'espresa irrealidá) y mou potencial
(qu'espresa posibilidá). Estes estremaciones provoquen diferencies de formes
como: falo / fale / falaré, faláis / faléis / falaréis, falábemos / faláremos
/ falaríemos, etc.
Pela so parte, l'imperativu constitúi una categoría aparte, pues —a diferencia
del restu— emplégase pa exercer una función apellativa sobre l'oyente.
5.1 Indicativu y suxuntivu
El mou indicativu espresa o bien que l'aición verbal ye daqué real o conocío
pal falante o bien que nun importa que seya real o conocío. Pela so
parte, el mou suxuntivu contempla l'aición verbal como daqué ficticio o
non conocío pal falante. Esto ye lo que fai que s'estremen pareyes de formes
verbales como falo / fale, falé / falara ~ falare. Exemplos: anque
faláis con él, nun va facevos casu (el fechu de vosotros falar ye ciertu);
anque faléis con él, nun va facevos casu (el fechu de falar ye inciertu, pue
dase o nun se dar). Puen vese tamién los siguientes exemplos: nun diz que
corría / nun diz que corriera; si lo ficisti tu ye fácil sabelo / si lo ficieras
tu yera fácil sabelo; pues llograr lo que quies / pues llograr lo que quieras,
el que lo diz equivócase / el que lo diga equivócase.
Hai usos que precisen siempre del mou indicativu. Por exemplu, les oraciones
nes que s'afirma daqué (diz que corría) o nes interrogatives (¿cuán-