Gramática - Academia de la Llingua Asturiana

(comen mazanes), complementu indireutu (cómen-y mazanes al neñu),
complementu circunstancial (comen pela mañana) y suplementu (comen
de les mazanes).
2.1.1 VERBOS PREDICATIVOS Y ATRIBUTIVOS
Acordies coles menes de conteníu al que fai referencia'l lexema, los verbos
predicativos puen clasificase, en:
- DURATIVOS O IMPERFEUTIVOS: espresen aiciones qu'amuesen un procesu
en marcha (xelar, xorrecer, vivir).
- TERMINATIVOS O PERFEUTIVOS: espresen aiciones que suponen el procesu
en marcha y la so acabación (cayer, pesllar, españar).
- INCOATIVOS: espresen aiciones que son l'entamu d'un procesu (alboriar,
adormentar, blanquiar).
- ITERATIVOS O FRECUENTATIVOS: espresen una sucesión d'aiciones repetíes
(trabayucar, espellicar, ceguñar).
- VOLITIVOS: espresen voluntá, deséu (querer, naguar, tarrecer).
Un determináu tipu de verbos, los llamaos atributivos o copulativos,
carauterícense porque'l so lexema aporta una carga de significáu perpoco
precisa. Estos verbos necesiten perllenar el conteníu del lexema cola información
qu'ofrez un sintagma al que normalmente s'asocien y que fai la
función d'atributu. Trátase de verbos como ser, tar, paecer, resultar y otros.
Nestos casos, la xuntura de verbu y atributu da-y a la oración un encontu
nel so significáu: la to casa ye blanca, el llobu ta famientu, esi llibru paez
bonu, les coses resultaron abegoses. Nos verbos atributivos el lexema verbal
queda incapacitáu pa desendolcar un complementu direutu, ún indireutu,
ún circunstancial y un suplementu. Sobre les oraciones atributives,
ver XXIV.
2.1.2 VERBOS TRANSITIVOS YA INTRANSITIVOS
Llámense verbos transitivos aquellos que davezu suelen enanchar la información
del so lexema con un complementu direutu; pelo contrario, son
intransitivos aquellos que nun s'acompañen d'esi complementu.
Sicasí, nun hai una llende que dexe estremar radicalmente unos d'otros;
ye'l contestu nel que s'empleguen el que decide si s'usa o non con oxetu
direutu. Asina, en los comerciantes piesllen los domingos el verbu pesllar
ta usáu con un significáu xenéricu talu que nun precisa de complementu
direutu. Y, per otra parte, verbos que primariamente s'empleguen como
XVI.
El verbu
173