Gramática - Academia de la Llingua Asturiana

XV.
Les
interxeiciones
168
Son interxeiciones que s'empleguen pa dirixise a un interlocutor o a dellos
interlocutores con estremaos oxetivos. Darréu amuésense les más conocíes:
á: precede siempre a un sustantivu o pronome, ensin pausa pel
mediu. Exemplos: á Lluis, nun comas tanto; á María, ¿qué quies?; ¡á tu!;
á fiyinos, facéi eso.
acuéi: emplégase siempre interrogativa, pa buscar l'asentimientu
de lo que se dixo. Exemplu: los d'esti pueblu somos los meyores, ¿acuéi?
adiós: úsase pa una despidida pa munchu tiempu o que se xulga
definitiva. Tien tamién usos pa espresar sorpresa, llamentu, etc.
ayó: pa dirixise a daquién. Exemplu: ¡ayó, nun tranques la puerta!
cho: pa dirixise a un home. Exemplu: ¡cho, echa unes palaes ehí!
eh ~ ei: pa llamar a daquién, pa llamar l'atención. Exemplos: ¡eh,
Pedro, trai les caxes!, ¡ei, cuidáu col coche!
fute: pa eliminar a daquién d'un xuegu, pa manda-y a daquién que
cole d'un sitiu.
ho ~ hom: pa dirixise a daquién. Conoz dos menes d'usu: o bien pa
dirixise namái a homes, lo que paez más cerca del so orixe dende'l sustantivu
home (nesti casu ho opónse a ne), o bien pa dirixise tanto a homes como
a muyeres, lo que paez usu más estendíu. Enxamás pue entamar enunciáu.
Exemplos: María, dame fueu, hom; Lluis, ho, nun me faigas de rabiar.
hola: emplégase como saludu.
llargo: úsase pa manda-y a daquién que cole del sitiu: equí nun
faes nada, asina que ¡llargo!
ne: pa dirixise namái a muyeres, n'oposición a ho cuando ésti
s'emplega únicamente con homes. Exemplu: ¿qué quies, ne?; á ne, va
cayete'l pendiente.
nin / nina: pa dirixise a un neñu o a una neña, estremando masculín
de femenín, y por estensión a persones mayores. Exemplos: ¿qué
quies, nin?, ¡ai, nina, qué llaceria!
oi: pa dirixise a daquién, con usos mui asemeyaos a á. Exemplos:
oi Xuan, ¿quién dices que vieno?; ¡oi tu, dexa eso! Ye posible que á y oi
seyan resultaos diferentes del mesmu orixe.
x ~ xt ~ xu: pa manda-y callar a daquién.
venga: p'afalar a daquién que faiga daqué.
5.2.2 PA DIRIXISE A ANIMALES
Estes interxeiciones empléguense pa dirixise a animales col envís d'influyir
nellos con estremaos oxetivos:
ache (úsase pa espantar los gochos)