Gramática - Academia de la Llingua Asturiana

4
Menes d'interxeiciones
4.1 Según l'orixe
Según el so orixe, les interxeiciones clasifíquense en propies ya impropies.
Les interxeiciones propies o pures son pallabres especializaes nesa categoría:
eh, guau, hola, buf, meca, etc. Esto nun evita que, en mención metallingüística,
puedan dar llugar a sustantivos: por exemplu, ¡ai! da orixe a
un sustantivu que se comporta como talu, con variación de númberu (l'ai /
los ais), con posibilidá de subordinación (un ai, munchos ais), etc.
Estes interxeiciones presenten davezu distribuciones y combinaciones de
consonantes que nun respuenden a les lleis normales constataes nel léxicu
de la llingua. Asina, atopamos en final de pallabra delles consonantes (buf,
hom, tic-tac), o combinaciones consonántiques (xt, bs-bs, cs-cs) non almitíes
fuera d'esta mena de pallabres. Amás, munches interxeiciones propies
sofiten el so significáu na entonación; esti ye'l casu de ah, ai, etc.
Pel so llau, les interxeiciones impropies o impures tán constituyíes por
vocablos que pertenecen al léxicu de la llingua y a otres categoríes de sintagmes,
pero que s'adautaron al valor y función de les interxeiciones.
Asina, ente elles hai sustantivos (Dios, home, degorrios), axetivos (claro),
alverbios (alantre, abaxo), verbos (disvia, anda, vaya).
Xeneralmente, les interxeiciones impropies son les que tienen mayor
enclín a presentar un significáu imprecisu. Nel orixe de les interxeiciones
impropies atopamos:
a) Frases esclamatives: ¡Virxen santa!, ¡por Dios!, ¡home!, ¡vaya!
b) Espresiones malsonantes: ¡la Virxen!, ¡rediós!, ¡coyones!, ¡coño!,
¡cago en + sustantivu!, ¡hosties! Munches d'estes espresiones, al convertise
en tabús llingüísticos, dan llugar a un correspondiente eufemismu:
¡la vircha!, ¡rediez!, ¡coime!, ¡concho!
c) Pallabres espletives o clixés: ¡bono!, ¡claro!, ¿oyisti?
d) Onomatopeyes: cri-cri, ¡zas!
4.2 Según el contestu entonativu
Según el contestu d'entonación, les interxeiciones puen ser:
- ONOMATOPÉYIQUES: imiten soníos o delles actividaes. Exemplos: miau,
xu-xu.
XV.
Les
interxeiciones
165