Gramática - Academia de la Llingua Asturiana

1
Les interxeiciones
Carauterístiques funcionales
XV
1.1 La interxeición como sintagma
Les interxeiciones son pallabres o espresiones especializaes nel enunciáu
esclamativu; ver XXIII.1. Carauterícense por ser signu autónomu que funciona
como mensaxe aislláu namái esclamativu. Puen presentase soles
constituyendo un únicu enunciáu esclamativu: ¡ei!, ¡miániques! Unes
poques, pelo contrario, nun puen apaecer si nun ye acompañando a otros
enunciaos: apúrrime'l platu, ho.
Pero tamién se puen presentar xunto con otros enunciaos y en diferentes
posiciones: al principiu, a lo cabero o insertaes ente medies a mou de
paréntesis. Los enunciaos qu'acompañen a una interxeición son davezu
esclamativos: ¡hala, colamos d'equí!; ¡qué gran home, recoime, yera
Antón!, ¡echa más café, home! Pero tamién puen ser enunciaos asertivos
o interrogativos: Xuan ¡miániques! nun quier venir; ¿qué hora ye, ho?
Delles interxeiciones obliguen a un allugamientu determináu dientro l'enunciáu;
asina, ho apaez obligadamente ente medies o al final, pero enxamás
al principiu.
Magar que les interxeiciones tengan esa capacidá d'apaecer xunto con
otros enunciaos, tienen siempre calter de sintagma estraoracional, asitiándose
fuera de la estructura de la oración o de cualquier otra mena d'enunciáu.
De fechu, la interxeición ye ella mesma un enunciáu completu.
Sicasí, esta observación xeneral tien delles esceiciones parciales nes que
la interxeición se combina, anque de manera muncho elemental, con otres
unidaes. Mesmamente, en dellos casos rexístrase n'organizaciones sintáctiques
más complexes, pero, pelo xeneral, de calter esclamativu.
Exemplos:
a) Interxeición, preposición y sintagma nominal: ¡coime col rapazacu
esti!, ¡ai del que nun obedeza!
b) Interxeición asociada a un esclamativu: ¡qué coime, yo colo d'equí!
c) Interxeición insertada n'oraciones esclamatives-interrogatives, como
términu dependiente de dalgún interrogativu tónicu: ¿qué coimes dixo?,
¿ónde narices punxisti les llaves?
XV.
Les
interxeiciones
161