Gramática - Academia de la Llingua Asturiana

XIV.
L’alverbiu
152
En segundu llugar, col sufixu -mente amestáu a la forma femenina del axetivu;
ver XXIII.3.7.3. Exemplos: miróme torcidamente, trabaya mui
curiosamente, falái selemente, falái prudentemente, guapamente-y da por
venir, siempre se comporten bonalmente.
Axetivos alverbializaos en neutru empléguense tamién como términos
subordinaos d'axetivos y d'otros alverbios. Exemplos: los tos neños son yá
abondo grandinos, el pueblu de Xintu ta muncho lloñe d'equí, paezme
qu'estes pataques tán poco rustríes, con cuatro culinos de sidra quedó
medio enfiláu, fixeron la carretera demasiao apriesa.
Pa cabu, otru métodu xenerador d'alverbios ye l'adautación d'espresiones
diverses de base sustantiva o axetiva que, gramaticalizaes, funcionen en
xunto como alverbios. Trátase de les llamaes locuciones alverbiales, que
se ven nesti mesmu capítulu, en XIV.6.
4
Adautación d'alverbiu a sustantivu
Los alverbios puen adautase a categoría sustantiva per aciu d'artículu. Na
práutica nun son munchos los que lo faen. Asina, los alverbios ayeri, güei,
mañana, agora, dempués, equí sustantívense nestos exemplos: yá nun
piensen abondo nel ayeri; faló del güei y del mañana de la industria
n'Asturies; nun-yos interesa l'equí y l'agora, sinón el dempués.
5
Menes d'alverbios
5.1. ALVERBIOS DE LLUGAR
Dellos alverbios de llugar tienen valor deícticu o demostrativu, esto ye,
amuesen un llugar en referencia al falante (equí), al oyente (ehí) o a nengún
de dambos (ellí). Son los siguientes:
equí / ehí / ellí
acá / allá / acullá
acó / alló / aculló
aquende / ende / alluende
Estos alverbios puen reducir el so usu a un puru valor fóricu, de referencia
a otros elementos qu'apaecen nel mesmu testu o contestu: ehí ("neso")
nun tienes razón, fallabes muncho ellí ("naquello").