Gramática - Academia de la Llingua Asturiana

XIV.
L’alverbiu
150
comparanza de superioridá (púnxose más atrás que los otros), d’inferioridá
(xubisti menos arriba que yo) y d’igualdá (el mio pueblu ta tan lloñe
como’l to ~ igual de lloñe que’l to ~ lo mesmo de lloñe que’l to).
Xeneralmente, los comparativos de toa mena fáense de manera analítica
—como nos exemplos vistos—, a nun ser nel casu de más bien y más mal
(canta más bien / más mal que’l fíu), que puen coyer tamién les formes
meyor y peor (canta meyor / peor que’l fíu).
En grau superlativu, el conteníu del alverbiu apaez cola so mayor intensidá.
D'acuerdu cola manera de formase, esisten dos menes de superlativu:
l’analíticu (abondo lloñe) y el sintéticu (perlloñe). Darréu amuésense posibles
tipos de formación:
a) Anteponiéndo-y al alverbiu'l prefixu per-. Exemplos: perbién, permal,
perrápido, percerca, perlloñe, pertarde, persele, permuncho.
b) Anteponiéndo-y al alverbiu'l prefixu re- o requete-. Exemplos: rebién,
requetemal.
c) Amestándo-y al alverbiu'l sufixu -ísimo. Exemplos: rapidísimo, munchísimo,
tardísimo, etc. En dalgunos casos ye -ísima la forma emplegada:
cerquísima. Ha tenese en cuenta, de toes maneres, qu'en xeneral los
alverbios refuguen esti sufixu; asina, nun son posibles formes como
*bienísimo, *lloñísimo.
d) Anteponiéndo-y al alverbiu otros alverbios de cantidá como muncho,
mui, bramente, etc. Exemplos: fízolo muncho bien, púnxose mui atrás,
corríen bramente rápido, etc.
e) Remanando procedimientos sintácticos, como reiteraciones (atopáronlu
cerca cerca), frases comparatives (xubió más arriba qu'un volador),
frases consecutives (cuerre tan rápido que nun se ve), etc.
Considérase redundante axuntar nel mesmu alverbiu dos procedimientos
superlativos al empar; diráse, entós, pertarde o tardísimo, pero non *pertardísimo;
mui bien o rebién, pero non *mui rebién; etc.
2
Carauterístiques formales del alverbiu
Seya procediendo d’axetivu (rápido, meyor, abondo...) o non (dafechu,
atrás, agora, entós...), los alverbios carauterícense por ser pallabres invariables,
esto ye, por nun presentar variaciones morfolóxiques de xéneru
nin de númberu, lo que-yos impide entrar en concordancia con nengún