Gramática - Academia de la Llingua Asturiana

apaez. Asina, por exemplu: el neñu llava la cabeza, meyor que el neñu llávase
la cabeza; tu enxagües les manes, meyor que tu enxágüeste les
manes; Xulio come les uñes, meyor que Xulio cómese les uñes; llimpia los
pies al entrar, meyor que llímpiate los pies al entrar.
Per otru llau, los pronomes reflexivos átonos úsense siempre cuando hai
qu'espresar conteníu recíprocu. Exemplos: los neños llávense la cabeza
(unos a otros, ún a otru), los vecinos d'esta cai nun nos cayemos mal (unos
a otros), el presidente y el secretariu nun se falen (ún a otru), vós veisvos
(unes a otres, una a otra), ellos dos xúlguense mal (ún a otru), nós facémonos
cafés (ún a otru, unos a otros).
Pero los pronomes reflexivos átonos enxamás s'empleguen pa espresar
interés o participación del suxetu na aición promovida por él mesmu. Esto
ye, l'asturianu refuga los reflexivos llamaos "dativos", "dativos d'interés",
"dativos superfluos", etc. D'esta miente, dizse cayí en suelu, non *cayíme
en suelu; tomé unos cafetinos, non *toméme; tán buscando trabayu, non
*tán buscándose; garres l'autubús, non *gárreste; etc.
Pue atopase más información sobre la reflexividá en XXIII.3.2.5, 3.2.6,
3.3.2 y 3.3.3.
3.4 Xuntures de dos pronomes átonos
3.4.1 OBSERVACIONES XENERALES
Respeutu del usu de pronomes átonos el verbu tien estes posibilidaes: nun
s'acompañar de nengún pronome átonu (compro); acompañase d'ún de
complementu direutu (cómprolu); acompañase d'ún de complementu indireutu
(cómpro-y); acompañase d'ún de complementu indireutu y d'otru de
complementu direutu (cómpro-ylu).
N'asturianu nengún pronome átonu camuda la so forma por axuntase con
otru pronome átonu. Ye lo que s'observa, por exemplu, en compré-y y
comprélu; los pronomes -y y lu, combinándose cola mesma forma verbal,
dan llugar a la secuencia compré-ylu, calteniendo caún de los dos pronomes
la forma orixinal.
Sobre la enclisis y la proclisis de los pronomes átonos respeuto del verbu,
ver XXIII.4.
3.4.2 ORDE DE LOS PRONOMES NES XUNTURES
Les xuntures de pronomes átonos, que nun puen superar el númberu de
dos, puen ser de dos menes:
XIII.
Los pronomes
personales
147