Gramática - Academia de la Llingua Asturiana

XIII.
Los pronomes
personales
140
1
Los pronomes
personales
Carauterístiques xenerales
XIII
Son pronomes personales aquelles pallabres especializaes na referencia
direuta a les persones gramaticales, seya como suxetu, términu preposicional,
complementu direutu o complementu indireutu.
1.1 Les persones gramaticales
Llámase persona gramatical al elementu llingüísticu que fai referencia a
dalgún de los actores de la comunicación. Los pronomes personales indiquen
qué persona gramatical ta rellacionada cola aición verbal.
Les persones gramaticales son tres, nel singular y nel plural:
- La 1ª PERSONA singular (o persona "yo") refierse al falante, a la persona
qu'emite un mensaxe. La 1ª persona plural (o persona "nós") refierse al
conxuntu formáu por "yo + otres persones".
- La 2ª PERSONA singular (o persona "tu") refierse al oyente, a la persona
que recueye'l mensaxe. La 2ª persona plural (o persona "vós") refierse a
un conxuntu formáu por "tu + otres persones" o bien a un conxuntu formáu
por dellos oyentes.
- La 3ª PERSONA singular (o persona "él") y plural (persona "ellos")
refiérense a toes aquelles persones o elementos fuera del falante o del
oyente.
La rellación que cada persona gramatical establez cola aición verbal per
aciu de los pronomes personales pue concretase nes funciones sintáctiques
yá conocíes: suxetu, complementu direutu, complementu indireutu, suplementu,
etc.
Un trazu carauterísticu de los pronomes personales ye que —a diferencia
de sustantivos, axetivos, etc.— puen coyer formes diferentes acordies con
delles funciones sintáctiques. Asina, la primera persona del singular en
función de suxetu cueye la forma yo (yo llevo a Xuana en coche), pero en
función de complementu direutu garra les formes min o me (Xuana llévame
a min en coche).