Gramática - Academia de la Llingua Asturiana

XI.
Los indefiníos
126
Cuando son sustantivos, dambos -es y entrambos -es puen llevar como términu
subordináu'l numberal dos, que vien a enfatizar el so significáu:
dixéronlo dambes dos, saludáronse entrambos dos con un abrazu.
4.2 Carauterístiques gramaticales
Mesmu, otru, tal, dambos y entrambos presenten variación de xéneru y
númberu. Convién tenelo en cuenta nel casu de tal; exemplos: tal asuntu,
tala hora, eso nun ye talo, talos asuntos, tales hores. Pel so llau, demás ye
invariable, anque establez rellación con elementos variables: la demás
xente, lo demás, los demás escolinos, les demás muyeres.
Pol so conteníu equivalente a "los dos, les dos", dambos dambes y entrambos
entrambes namái tienen forma plural.
Mesmu y demás nun tienen autonomía sintagmática, fechu que-yos niega
la posibilidá de constituyir enunciáu por sí mesmos. Únicamente puen
facelo sustantivaos necesariamente per aciu del artículu: el mesmu, la
mesma, lo mesmo; lo demás, los demás, les demás.
Tamién tal tala talo pue entrar en correllación con cual ~ cualu cuala
cualo: esos son tal pa cual, ellos son talos pa cualos, son tales pa cuales.
Otres vegaes, produzse la correllación tal... tal: de tal pá tal fíu, a tales
entrugues tales respuestes.