Gramática - Academia de la Llingua Asturiana

XI.
Los indefiníos
124
Pelo contrario, daquién, dalguién, dalgo, naide, nada y quienquiera son
invariables y asóciense siempre a singular. Daqué, como axetivu, ofrez
forma invariable, pero pue entrar en rellación con sustantivos variables en
xéneru y númberu (daqué pueblu, daqué ciudá, daqué rapazos, daqué persones).
Lo mesmo-yos asocede a cada y cualquiera ~ cualesquiera: un llibru
pa cada rapacín, cada pocos metros hai un finsu, un llibru cualquiera
o un llibru cualesquiera, unos llibros cualquiera o unos llibros cualesquiera,
una llibreta cualquiera o una llibreta cualesquiera.
Otros, en función de nucleu sustantivu, concuerden siempre en masculín
(daquién o dalguién malu, naide escondíu, quienquiera que tea informáu)
o en neutru (dalgo malo, daqué blanco, nada prestoso).
Daquién, dalguién, naide y quienquiera namái funcionen como sustantivos.
Otros son axetivos que, como ye esperable, puen sustantivase: vieno
una muyer d'Avilés ’ vieno una d'Avilés, dalgún diputáu faló del asuntu
’ dalgún faló del asuntu, alquilen delles cases ’ alquilen delles, nun ye
de nenguna vecina ’ nun ye de nenguna, nun veo dala cosa ’ nun veo
dala, entrúga-y a cualquier guardia ’ entrúga-y a cualquiera.
Hai que destacar el fechu de que cada, a diferencia del restu, nun tien
autonomía sintagmática, polo qu'enxamás pue constituyir enunciáu por sí
mesmu.
4
Indefiníos identificadores
4.1 Conteníu y formes
Dáse-yos el nome d'identificadores a un grupu heteroxeneu d'indefiníos
que tienen a comuña l'amosar estremaos criterios d'identificación d'oxetos
o persones de la realidá. Son los que siguen darréu:
mesmu mesma mesmo, mesmos mesmes
otru otra otro, otros otres
demás
tal ~ talu tala talo, talos tales
dambos dambes
entrambos entrambes
Equivaliendo al neutru otro, esiste tamién l'arcaísmu ál, emplegáu en locuciones
como daqué ál "dalguno otro, dalguna otra cosa" y lo ál "lo otro".